Gerîlayê HPG û YJA Starî derheqê tecrîdo girankerde ke Rayberê Şarê Kurd Abdullah Ocalan ser o yeno ramitiş de qisey kerdî û vatî: “Rayber Apo xeta ma ya sûr o û heta ke ci ra xeberêke bêro girewtiş û azad bibo, ma dê têkoşîna xo bidomnî.”

Rayberê Şarê Kurd Abdullah Ocalan ke Îmrali de binê tecrîdêko girankerde de yeno tepiştişî ra teşebbusê derbeya 15ê Temmuze ra na het ti xeber nîna girewtiş. Her çiqas ke îdarekarê AKPî vanî rewşa Ocalanî rinda zî nê vatişî hem şarê kurd û hem zî  Hereketê Azadî yê Kurdî şa nêkena. Babete ser o gerîlayê HPG û YJA Starî qise kerdî.


Azadîya Rayverîya xo hedef keme 

Gerîlayanê YJA Starî ra Raperîn Vînar dîyar kerd ke her çiqas ke teşebbusê derbeyî ke 15 Temmuze de ser nêkewt zî no teşebus bi sebebê girankerdişê tecrîde ser Rayverê ma  û wina dewam kerd: “Ma nika Rayberîya xo ra ti zanayîş nêgenî. Xora 27ê Temmuze 2011î ra na kişt Rayberîya ma ser o tecrîdeke esto. Nêverdanî ke pawitox û malbatê xo reyde pêvînayîş bikero. 5ê nîsane 2015î ra naşt zî tecrîdêko girankerde Rayberîye ser o yeno domnayîş. Ma 15ê Temmuze ra naşt zî cuyayîşê ci ra etiryenî. Dewleta tirk vana rewşa ci baş o la ma dewleta tirkî ra bawer nêkenî.”

Gerîla Raperîn Vînar bal ant ser azadîya Ocalanî û wina vat: “Her çiqas ke seba wedartişê tecrîdî kedêke yena dayîş zî, nê bes nîyî; ganî Rayberîya ma azad biba. Encax bi no hawa aştî û huzur aver şono. Derbe reyde cuya Rayberîya ma mîyanê talûke de ya. Ma bi no hawa gênî dest û nêzdî benî. Dijî polîtîkayê ke wazenî şaran werte ra wedarnî, ganî biratîya tirk-kurdan esas bêro girewtiş. No zî encax bi azadîya Rayberîya ma mumkin o. Rayberîye sebebê estbîyayîşê ma yo.”


Şexsê Rayverîye de merdimîye binê tecrîdî de ya

Gerîlayê HPG Zagros Serhat zî ciresna ke Rayberê Şarê Kurd Abdullah Ocalan serra 1999î ra naşt binê tecrîdêko giran de yo û wina vat: “No tecrîd raşt e raşt şexsê Rayberîye de yeno meşnayîş la raştîya xo de heme merdimîye binê tecrîdî de ya. Hedîseyê ke prosesê peyên de Tirkîya de qewimîyayî ra pey Rayberîye ra ti xebere nîna girewtiş. No zî seba gerîlla sebebê şerî yo. Rayberîye seba ma yeno manaya agêrayîşî raştîya xo. No semedî ra ganî heme merdimîye tecrîdî qebul nêkerî û sere wedarnî û taxan veng nêkerî. Ganî bawerîya xo beyanatê dewlete ra nêarî.”

Gerîla Zagros Serhat vat ke heta ke yew xebere Ocalanî ra nêra girewtiş ganî çew taxan veng nêkero û domna: “Xora na rewşe seba gerîllayî sebebê şerî yo. Gerîlla heme wextan ra hîna bi hêz o û eşkeno bi awayo tewr baş cewab bido. No semedî ra ma gerîllayî çîyo ke bikewo vileyê ma, ma do bikerî. Rayberîye seba ma û şarê ma xeta sûr a û heta ke Rayberîya ma azad biba, ganî taxî nêrî veradayîş.


Şewqê Rojhelatê Mîyanî yo

Gerîlaya YJA Stare Şîlan Zap ard ziwan ke her çiqas ke dewlete vana rewşa Ocalanî baş o zî gerîllayî nê vatişî ra bawer nêkenî û ger ke wazenî ke wa gerîllayî înan ra bawer bikerî, ganî gerîllayî bi xo Ocalanî biveynî û wina vat: “No derbe ra dima ganî şar taxan qet veng nêkero. Ganî doman, pîr û cenî her kes çalakîyanê xo bidomnî. Semedo ke ma Rayberîya xo rayberê heme Rojhelato Mîyanên vînenî, ma eşkenî bivajî ke heme rayberê Rojhelato Mîyanên yeno tecrîdkerdiş. Nika ra pey ganî ma seba azadîya Rayberîya xo bêmabên têkoşîn bidî. Çimkî Rayberîya ma seba Rojhelato Mîyanên bîya şewq.”


Ma dê bi rihê Kobanê seba Rayverîya xo têkoşîn bidê

Gerîlayê HPG Rubar Qoser zî bal ant etiryayîşê şarê kurdî yê seba Rayberîya xo û wina verdewam kerd: “Wexto ke Rayberîya ma bi heyetê HDPî pêvînayîş kerdênê, Rayberîye heyetî ra vatbî ‘Ma seba ke 150 metre dûrî de yî, min tehdît kerdî.’ Xora hukimatê AKPî derbe ra dima vatbi ke do 3 aşmî Îmrali ra xebere nêro girewtiş. No zî hem etiryayîşê ma û hem zî yê şarê ma zêde keno. Rayberîye seba tevger, şarê kurd û şarê Rojhelato Mîyanên manayêka gird a.”

Gerîla Rubar Qoser dergeyîya qalîkerdişê xo de wina vat: “Bi taybetî no proses de ganî şarê ma bivejyo raşteyan. Senî ke bi ruhê xoverdayîşê Kobanê raşteyan seba dagirkeran kerd cehenem, ganî heman awayî seba Rayberîye zî bikero. Çimkî ê ke ma heta eyro ardo Rayber Apo yo. Ger ke ma na dinya de awayo bi şeref cuyenî se no saya Rayber Apo de yo. Senî ke seba merdimî awe çîyo ke muhîm o se, Rayberîye ra xebere girewtiş û azdîya aye zî ganî seba ma no duştî de bibo.” 


 ANF/BEHDÎNAN