7ê asma nîsane Dûseldorf ra bi teyara şîme başurê Kurdîstanî. Jû heyetê Komela Newede Virastena Dersîmî fermî hetê Wezaretê Enfal ra ameyî bî silayîye kerdene. Ez kî tey şîne. Dolimo viren ez payîzê serra 2003 şî bî Başur. O waxt Amerîka newe kewtî bî Iraq.

Suleymaniye de teyare ra ameyme war. Tabî seweta welato xo gune vîze bijerîme. Hama no prosedur zaf derg nêrameno, la mordemî rê xerîb yeno. Sona welatê xo, gune vîze bijerê.
Heyetê dersîmizî Suleymaniye de xêle diyayîşî viraştî û Tertelê Dersîm ser zonayîs da. Diyayîso viren sermiyanê karê teverî yê Hereketê Goranî, birêz Celal Cever de virajiya. Heyetê dersîmiz kar û gurê xo ser zonayîs da û Hereketê Goran ra mavênê netevan de seweta naskerdena Tertelê Dersîmî yardim wast.
Derheqê Tertelê Dersîm de diyayîsê diyîne sekreterê polîtburo yê YNK birêz Mele Bextiyar de virajiya. Mele Bextiyar YNK de Talabanî ra dime yeno. No diyayîs de kî Tertelê Dersîm ceriya dest. Mele Bextiyar vat: “Her hetê Kurdîstan de, Başur, Bakur, Rojava û Rojhilat de terteleyî biyê, na semed ra kurdî gune piya bigureye. Dezê ma jû yê, destebera ma ke çi ame aye keme.” Heyetê Dersîmiz diyayîsan de siyasetvanê başurî silayiya Dersîm kerdî.
En diyayîso muhîm kî wezîrê Enfal birêz Aram Mihemmed de virajiya. Na diyayîs de meselan sero zelal zelal qesey bî. Çike birêz Aram Mihemmed na derheq de tam muxatab bî. Jû persî ser wezîrê Enfal birêz Mihemmed vat: “Projada ma esta. Ma wazeme jû vaqif ronîme û na vaqif gune pêro tertelanê kurdan sero bigureyo, nî Tertelan mavênê netevan de rojdem kero. Û vaqif de gune her hetê Kurdîstan ra însanî piya bigureyê.”
14ê asma nîsane kî Çemçemal de yadkerdena Enfal biye. Heyetê ma naca tewrê yadkerdene bî û hetê wezîrê Enfal ra ame peşvazî kerdene. Teyna Çemçemal û dormê ci de 1988 40hezar ra jede kurdî ameyî bî qirkerdene.
15ê asma nîsane kî şîme Halepçe û yadê Halepçe ziyaret kerd. 1988 Halepçe de se biyo, binê monumentê Halepçe de amo rafîştene. Çiyoke naca en jede alaqa mi onte, jû xortoke Tertelê Halepçe ra dirvetin xeleşiyo, nika muze de memur o û meymanan rê tarîxê Halepçe dano naskerdsene. Gorê vatene, bi seyan domonê kurdîyêke Îran de amê tedavî kerdene, hona vînd biyayê. Muzeya Halepçe de qerarê îdamê Saddam Huseyîn, qelema îmza, qerarê îdamê kîmyasal Alî, qeleme û layê darkerdena ey zî amê rafîştene.
Heyetê dersîmiz oda Bazirganiye, serokê karsazan û serokê mutahîtan de kî diyayîşî viraştî.

* Enfal namê Jenosîdê kurdanê başur yo. 1986 dest kerd ci u hata 1989 devam kerd. Mavênê na waxtî de 183hezar kurdî ameyî qetil kerdene.