Weçînayîşê 24ê Hezîrane bin zext û zordarîyanê girdan de derbaz bi. Herçiqas ke îqtîdarî heme planê xo seba derbaznêbîyayîşê bendê weçînayîşê yê HDPyî viraştbî, labelê HDP bendê weçînayîşî derbaz kerd. Kurdî xeylê bajaran de vejîyayî raşteyan û hem serkewtişî pîroz kerdî û hem zî hêrsê xo nîşan dayî.

Weçînayîşê 24ê Hezîrane bin şert û mercê zext û tedayinan de derbaz bî. Goreyê netîceyê nêfermî yê weçînayîşê 24ê Hezîrane, Partîya Demokratîke ya şaran se ra 11.60 rayî girewtî û goreyê nêyî HDP 67 parlamenteran erşaweno Meclîsê Tirkîya.

Herçiqas ke partîyanê muxalefetî weçînayîşî ra dima vatêne ‘hîna se ra 50ê sindoqan aşkere bîyî’, labelê Ajansê Anadolu yê dewlete dîyar kerd ke se ra 85ê rayan ameyo humarene. No zî nîşan dano ke îqtîdarî talîmatêko senîn dayo.

Sere de bajarê Kurdistanî yê Amed, Şirnex, Çewlîg, Meletî, Merdîn, Riha, Wan, Mûş, Erzîrom, Edene û Îdir de û bajarê Tirkîya yê Stenbol, Îzmîr, Kocaelî, Denîzlî, Balikesîr, Rîze, Artvîn, Antalya, Hatay û sewbîna xeylê bajaranê bînan de zext, teda, tirawitiş û sewbîna ameyî kerdene. Xeylê cayan de pusulayê morkerde mîyanê çopan ra ameyî dîyayene. Riha de çeteyê namzedê Îbrahîm Halîl Yildizî ke çend rojî verê Pirsus de yew keyeyî ra 3 kesî qetil kerdbî, roja weçînayîşî xeylê wezîfedaranê sindoqan derb kerdî. Zafaneyê dewanê Kurdistanî de leşker, qoricî û sewbîna hêzê dewlete bi zorê sîlehî zextî weçînitoxan ser o kerdî.

No weçînayîş de Îslamo Sîyasî qezenç kerd

No weçînayîş de hewl dîya HDP binê bendê weçînayîşî de bêro verdayene zî, HDP se ra 11.6 girewt û bendê weçînayîşî derbaz kerd. Herçiqas ke Erdoganî weçînayîş ra ver rasteyan de bi hawayo aşkere dîyar kerdêne ke o nêwazeno HDP meclîs de bibo, labelê HDP bendê weçînayîşî derbaz kerd. Wexto ke weçînayîş ra dima Erdogan vejîya ekranan ver, mirûzê ci ra dîyar bi ke o netîceyê weçînayîşî ra memnun nîyo. Rojnameger Aydin Engînî babete ser o nuşteyê xo de tespîtê “No weçînayîş de Îslamo Sîyasî qezenç kerd û demokrasî vînî kerde’ kerd.

Heto bîn ra şanê weçînayîşî bi hezaran kesî vejîyayî raşteyan û derbazbîyayîşê bendê weçînayîşî yê HDPyî pîroz kerdî. Labelê Amed, Wan, Riha, Mêrdîn, Colemêrg û Edene de polîsan hêrişê şarî kerdî.

HDP 11 bajaran de bi partîya yewine

Goreyê netîceyê nêfermîyan HDP 11 bajaran de bi partîya yewine. Reyna AKPyî bajarê Colemêrg, Dêrsim û Îdir de qey parlamenter nêvet. Bajarê Kurdistanî de goreyê nîsbetê weçînayîşî netîce wina yî: Amed %65.78, Dêrsim %51.25, Agirî %62.60, Mêrdîn %59.78, Êlih %62.89, Şirnex %70.79, Sêrt %51.70, Colemêrg %70.08, Wan %59.50, Îdir %43.85 û Mûş %49.81. Reyna HDP goreyê rayanê teberê welatî 7 welatan de bi partîya yewine. Goreyê netîceyî HDP Engilistan (se ra 48), Fînlandîya (se ra 49.2), Îraq (se ra 47.9), Swîsre (se ra 39.7), Îtalya (se ra 35.2), Japonya (se ra 44.3) û Ukrayna (se ra 39.5) bi partîya yewine.

HDP hetanê cîyayan erşaweno meclîs

HDP xeylê hetan ra parlamenteranê cîya-cîyayan erşaweno meclîs. Goreyê weçînayîşî HDP Garo Paylano armenî, Mîthat Sancaro ereb, Alî Kenanoglu, Kemal Bulbul, Zeynel Ozen yê elewî, Tuma Çelîko suryanî, Feleknas Ucaya êzidî û sewbîna cîya-cîya nasnameyan ra parlemanteran erşaweno Meclîs. Reyna rojnamegerî Ahmet Şik û Tayîp Temel, ekonomîst Erol Katircioglu, nuştox-akademîsyen Omer Faruk Gergerlîoglu û zî şîyî meclîs.

Reyna 67 parlamenteranê HDPyî ra pêro pîya 25 parlamenterê cinîyî şîyî Meclîs. Bajar û qezayê ke hetê dewlete ra ameybî rijnayîş de HDP bi ferqêko gird serkewt. Bitaybetî Şirnex, Cizîr, Silopî, Hezex, Nisêbîn, Sûr, Gever û sewbîna cayê ke hetê dewlete ra ameyî rijnayîş de HDP rekor şikna. Goreyê netîceyê weçînayîşî vera zîhnîyeto ke rasteyan de vatêne ‘problemê kurdî çin o’ de rastîya kurdan qezenç kerde.

 

MERKEZÊ XEBERAN