Seba na rengînîya xo, xo resnayî no derax. Seba na rengînîya xo zî kurdî mîyanê xo de zaf weşvînaye yî. Çirê zaf weşvînaye yî? Çimkî kurdî mîyanê xo de heme reng û cîyayîyan hewînenî. Ma bihûmarî? Kurdî hetê zaravayan ra; kurdê kirdasî yî, kurdê kirmancî yî, kurdê soranî yî, kurdê goranî yî, kurdê lekî yî. Hetê olî ra; kurdê elewî yî, kurdê sunnî yî, kurdê êzîdî yî. Hetê azadîye ra weşvînayox, sekuler î. Hetê cenîyan ra cenî afirnayox û azadîwaştox a. Kurdî nê cîyayîyanê xo reyde est î û dewlemend î. Nê cîyayîyanê xo reyde vera heme xafil û belayan ra xo ver da yî. Heme şert û mercî de teslîmîyet, bindestî û esaretî qebul nêkerdî. Tim edet û kulturê xo pawitî.
Kurdî mîyanê xo de hende cîyayî nêbîyinî beno ke heyanê nika rewna vînî bîybîyî, şîybîyî. Qewetê xo, binkeyîya xo nê zengînan ra gênî. Yew rey cenîyê ma cenîyê sewbîna mîletan ra pênêmanenî. Cenîyê mê tim mêrdeyê xo het ca girewtî. Heme fedekareyî kerdî. Nika zî hem seba azadîya xo û hem zî seba azadîya şarê xo têkoşîn danî. Û xelisîyayîşê ma kurdan zî fedekarîya cenîyan ser ro ba, serkewtiş nêzdî yo. Yew komelî de cenî heme waran de aktîf û vernî de ba, bedilîyayîşê komelî lez beno, hişmendîya komelî azadeyî ser ro newe beno.
Ma kurdî seba ke qewetê xo nê cîyayîyan ra gênî ma ganî nê cîyayîyanê xo zî bipawî û pawitiş zî bes nîyo xurt û geş bikerî. Eke zarawayê ma binê tehlukeyî de yî ganî ma ca de dest bierzî nê gureyî. Nê tehlukeyî bertaraf bikerî. Û ma bizanê ke eke yew zaravaya ma binê tehlukeyî de ba û no tehluke nêyero hewanayîş o wext dor yeno zaravayanê bînan. Ê zî xo binê tehlukeyî de vînenî. Nê semedî ra tehluke tehlukeyê ma yê hemînan o. Nê tehlukeyî ra ma sîneyê xo nêronî ma kurdî ko vînî bibî.
Elewîyê ma yan zî êzidîyê ma binê tehlukeyî de bî û ma cayê xo de ronişî temaşe bikerî beno? Eke ma na hawa bikerî o wext qiyametê kurdan ameyo. Eke nê cîyayîyan ma ra yew zirar bivîno û zirar telafî nêbo, o wext ma nêvajî ma kurdî. O wext hinî ma kurdî nêmcet mendî, o wext ma kurdî rengînîya xo ra yew reng vînî kerdo. Mela na hawa çî nêbo.
Xafilê ma kurdan ser ro nêqedîyenî. Mesela zî na nîya. Mesela wexto ke nê xafilî biyerî ma kurdan ser ro ma ko se bikerî? Wexto ke nê xafilî ameyê ma kurdan ser, ganî ma ca de xo û cîyayîyanê xo bipawî û ma mîyanê xo de hetkarî zaf berz bikerî. Nika êzîdîyê ma zaf tengayî de yî. Siba beno ke elewîyê ma, disibay beno ke sunnîyê ma, hîrêsibay beno ke hemrewanê ma tengayî biancî. Xayeyê ma kure de cîyayîyê ma binê tehlukeyî de yî ganî ma hetê înan de bî. Ma nê cîyayîyanê xo reyde est î. Cîyayîyê ma sebebê estbîyîşê ma yî. Ê est î ke ma est î. Înan ra yew kêmî bibo ma xo kurd nêhesibnî.
Zerweş ESNAW