Operasyono bi nameyê ‘Şero Gird’ ke seba xelesnayîşê bajarê Reqa hetê Hêzê Sûrîyeya Demokratîke (HSD) ra amebî destpêkerdiş, dewam keno. Şerwananê HSDyî heta nika 5 taxan destê DAIŞî ra xelesnay û çarçeweya sehnayîşî de xeylê cayê viraştişê sîlehan yê DAIŞî kewtî destê şerwananê HSDyî.
Mîyanê nê operasyonî de şerwanê enternasyonalîstî zî cayê xo gênî. Nînan ra yewe zî şerwano îrlandayij Çîya Demhat o. Babete ser o Demhatî qisey kerd û hîsê xo pare kerdî.
Demhatî va ‘ez 4 aşmî verê ameya Rojawan û dima ra mi perwerdeyê sîyasî û leşkerî dî’ û wina dewam kerd: “Ez rew adapteyê cuya tîya bîya û ez kurdî musaya. Zerrîya şorişê Rojhelato Mîyanênî Rojawan de erzena.”
Şorişê Rojawa vila beno
Demhatî dewamê qiseykerdişê xo de va ‘Şorişê Rojawanî vilayê heme parçeyanê Sûrîye beno’ û wina domna: “Seba ke ma Reqa rizgar bikerî, ma operasyonêko gird dayo destpêkerdiş. Ez seba ke hetkarî bida merdimanê tîya, beşdarê YPGyî bîya. Têkoşîno ke yeno dayîş tena seba Sûrîye nîyo, do bibo malê heme dinya.”
Seba şaran şer kenî
Demhatî qiseykerdişê xo wina qedêna: “Têkoşînê şarê Îrlanda û yê Kurdistanî zaf yewbînan manenî. ÎRA û YPG her di zî vera dişmenî de şer kenî, her di zî dawaya şarê xo kenî û xizmetê şarî kenî. Dişmenê girdî yê şarê Kurdistanî ke mîyanê çar dewletanê girdan de cuyenî, estî. Labelê no şar qet fek têkoşînî ra veranêda. Ez zî wazena mîyanê nê têkoşînî de ca bigîra û têkoşînî bidomna. Nika çimê heme şarê cîhanî Reqa de yo. Ma do demêko kilm de bajarî bigîrî û do bajar bibo, bajarê şaran.”
NAZIM DAŞTAN/DÎHABER/REQA