Nayî ra çend aşme ver, qirkerdişê sîyasî yê dewlete Tirkîya hona vîrê ma hemîyan de yo. Şewa çaharê teşrîna peyêne de, yewendes parlamenterê HDP bi yew operasyonî amey tepiştiş. Mîyanê nê parlamenteran de hemserokê pêroyî yê partî zî estbî. Na qirkerdişê sîyasî ra dima zî tayê parlamenterê bînî yê HDPyî gegane bi behaneyê îfade amey tepiştiş. Ma eşkenî vajê ke dewlet ser parlamenteranê HDPyî seke xapînokî virazena. Tepiştişê parlamenteranê HDP goreyê rewşê sîyasî yê Tirkîya bedilîyeno û çi wext ke kewtî tengî, yew parlamenterê HDP eştî zerre. Verba na rewşî parlamenteranê HDP sereyê xo nimz nêkerdî û mehkemeyan de verba sîstemê nêheq bi sereberzî vindertî.
Verba kerdenanê nêheq pêrokîn parlamenterê HDP, hem sîyasetê zerreyî de hem zî sîyasetê teberî de sey murcelayan xebetîyenî. Înan yew hetî ra bajarane xo de û mîyanê şarê xo de sîyaset û gureyê xo yê rojane dewam kenî, yew hetî ra zî meclisê Tirkîya de verba sîyasetê qilêrîn vindenî. Heto bîn ra zî teberê welatî de, Ewropa, Amerîka û xeylê welatanê bînan de rewşa partîya xo îzeh kenî, raştîya Erdogan û dewlete eşkera kenî. Rewşa hemserokanê HDP û sîyasetkaranê kurdan ser o zî hem îzehet danî, hem zî semedê serbestîya parlamenteranê xo destek wazenî.
Nê xebatê HDPyijan xeylek erjayeyê. Ma zanê ke dewleta Tirkîya hewldayenê derbe ra dima, halo îstîsnayî îlan kerde û neyî seba xo açarna yew firsendî. Wîna aseno ke no halo îstîsnayî do hona wextekê derg dewam bikero. Nayî ra parlamenterê HDP û sîyasetmedarê Kurd nêeşkenî bi rehetî xebatane xo bikerî. Hewldayenê derbe ra dima, hemê îdarekarê partî yê HDP û DBP erzîyayî zîndanan. Bêguman na rewşe barê HDP hona vêşî kerd gîran. Heto bîn ra, ma zanê ke bî taybetî dewleta Tirkîya zordarîya xo de wina nêmanena.
Na ridî ra gereka parlamenerê HDP pêşnîyazanê şarê kurdî bigîrê û rosna nê pêşnîyazan de rayîrê xo yê sîyasî kifş bikerê. Sey her wexte ganî ma xo vîr ra nêkerê ke hereketê Sîyasî yê kurdan, bi şarê xo aver şîyo. Her wexte de goş bidenî şarî ser. Çunke xelasîya welatê ma şarî de yo.