Vizêr 16 meyîtî ameyî hawanayîş. Bi des hezaran hemwelatijan ê rast kerdî. Seba ke taxa Nurî de teqayîşî estbî, hûmara merdeyanê ucayî hema hema nêameyo tesbîtkerdiş. Coka beno ke na hûmare vêşî bibo, çimkî hîna xeylê kesê dirbetinî nêweşxaneye der ê.
Meyîtê xo rast kerdî
Kuçeyê Cizîrî bi fîşekan pirr ê. Bi taybetî taxa Nurî ke hedefo bingeyîn ê hêzanê tirkan bî, cayê cengî ra maneno. Tîmê taybetî û lejkeranê tirkan hende gule û topî eştî ke hema-hema her ban zirar dîyo. Rayan de barîkatî estê. Cizîrijan ke derheqê rewşa xo de qisey kerd û vatîy: “Her şewe vengê topan ame. Ma besenêkerd ke vejî teber. Eke ma bivejîyaynê, ma bînê hedefê nîşandaran. Heta şodir ma besenêkerd ke rakewî, ma rastê wehşetî amey.”
Wezîfe re gêrîyaye
Yewna netîceya hawanayîşê abluqaye o bî ke Hemsereka Şaredarîya Cizîrî Leyla Îmret hetê Wezaretê Karan ê Zereyî yê Tirkîya ra karê xo ra ame eştene. Goreyê wezaretî ra Îmret ‘Propagandaya Terorî’ kerda. Wexto ke Îmret amebî weçînayîş % 83’ê rayan girewtbî. Derheqê rewşa Cizîrî de Îmret wina qisey kerd: “Tîya de werdê domanan ra heta lazimîya xidaye, her çîyî esto. Bi taybetî seba domanan paştîya psîkolojîk lazim o, çimkî nê rojanê peyênan de înan tîya de cengok gird dî.”
Se bibi?
4’ê êlule 2015, saet 20:00 de dewleta Tirkîya seba Cizîrî qedexeya vejîyayîşê teberî ronabi. Hetê HDPe ra di heyetî ameyî rusnayene Cizîrî. Nê heyetan mîyan de xeylê parlamanterî estbîy. Roja hîrêyin a dorpêçê Cizîrî de rayîro serek ê Xezexî de yew xorto kurd bi nameyê Saîd Çagdavul hetê hêzanê asayîşî yê tirkan ra ame kiştene.
NAVENDA XEBERAN