Hemsereka Şaredarîya Qezaya Licê ya Amedî Rezan Zugurlu, bi sebebê cezayêka aye verê estbî û semedo ke ameya tesdîqkerdiş vizîrî amî tepiştiş.
Wexto ke Rezane dayîka xo reyde Caddeyê Lîse yê Amedî ra derbaz bîyêne, polîsan bi wesayîtanê zirxinan vernîya înan girewt û waştî ke Rezane bitepişî. Dayîka aye wucûdê xo kênaya xo rê kerde sîper û nêverdaye ke polîsî kênaya aye bîşêrî. Dima ra polîsan Rezane û dayîka aye Fîruze Zugurlî derb kerdî û Rezane erdî ra kirantî û kerdî wesayîtê zirxinî. Rezan Zugurlî ya ke ameye tepiştiş, eşrawitî Zîndanê Tîpa E yê Amedî.
Dayîka Rezane Fîruzeye qala tepiştişê kênaya xo kerde.
Dayîke wina va: “Grûbêka polîsan ke bi cilê sivîlî paydaye bîy û ma nêzanayêne ke polîs î, dormeyê ma girewtî. Ma hema fam nêkerd se beno, heqaretê ma kerdî. Waştî Rezane bitepişê. Mi zî va, ‘şima kam ê, çira şima kênaya mi benê, ez nêverdana’ û mi kênaya xo girewt pey xo.”
Tehdîdê ‘Ma do to bikişê’
Fîruzeye daye zanayîş ke kênaya aye bi zorî wenayî wesayîto zirxinî û wina va: “Wexto ke mi hewl da ez zî wenîşa wesayîtî, yewî milê mi ra girewt û mi eşt erd. Şimikê mi lingê mi ra vejîyayî. Semedo ke xebatê rayîrî bî, ez kewta asfaltî ser û lingê mi veşayî. Milê mi heme sîya bî. Her nengî û heqeretê ma kerdî. Ez zî hêrs bîya û mi va ‘şima şerm nêkenê winî nêzdîyê ma benê?’ Yewî xo nêzdîyê mi kerd û va ‘ez do to bikişî.”
Fîruzeye arde ziwan ke semedo ke derb werdo, nêeşkaya erd ra biwerzîya û va ke seba ke raporê derbkerdişî bigîro, bi taksî şîya Nêweşxaneyê Dewlete yê Selahattîn Eyyûbî. Fîruzeye dîyar kerde ke dima ra aye musaya ke ê polîs bîyê û va ke aye do derheqê înan de muracatê sucî bikero.
SAFÎYE ALAGAŞ/ŞÛJIN/AMED