Hemsereka Kongraya Komelê Demokratîkî û Parlamentera HDPyî ya Colemêrgî Leyla Guvene û heyetêk Riha de rêxistinanê sivîlan zîyaret kerd. Guvene wextê zîyaretî de qisey kerde û vera tewqîfbîyayîşê endamanê Kongreya Komelê Demokratîkî de reaksîyon nîşan da.
Guvene dîyar kerde ke çîyê ke Riha de benî manenî bîyayîşanê 12ê Êlule û wina va: “Seke Riha de komarêka bîne esta, muameleyê winasî yenî kerdene. Wexto ke merdim tepiştişan ra ewnîyeno, na raştîye vîneno. Wexto ke hêrişê dagîrkerîye ameyî kerdene, verê cû Riha de 30 kesî tewqîf bîyî. Nê operasyonî teberê huqûqî de yî.”
Guvene qiseykerdişê xo de derheqê Kongreya Komelê Demokratîkî de tayê melumatî dayî û wina va: “2007 de wexto ke Kongre ameye awankerdene 800 û dima ra zî 500 delegeyê kongre estbîy. Heme xebatê Kongre raya pêroyî rê akerde yî. Kesê ke tede ca gênî nê bajar de cuyenî û hemwelatîyê nê welatî yî. Werte de sucêk çin o û suc hetê dewlete ra yeno xelqkerdene. No operasyon seba nêyî ameyo kerdene. Seke yeno zanayene xeylê akademîsyen, nuştox, roşnvîr û sewbîna kesî zî beşdarê xebatanê Kongre bîyî. Hetta hemserekê Kongre hetê Serekê Meclîsî yo verên Cemîl Çîçekî ra zî dawetê Meclîsî ameybî kerdene. Kongre seba çareserîya problemê Kurdan têkoşîn dayo û do bido zî.”
Riha vera Nemrudan de sere nêronayo
Guvene peynîya qiseykerdişê xo de wina va: “Kerdişê teberê huqûqî çîyêk bi Tirkîya nêdanî qezençkerdene. Çîyê ke benî, zirar danî demokrasî, heqê merdiman û sabikaya Tirkîya. No şar bi serran o ke sere nêronayo û nika ra pey zî nêroneno. No şar qet vatişê raştîyan ra fek veranêdano. Ewro bi hêrişkerdişê Rojawanî netîce nîno girewtene. Fek çîyê ke şima vera şarê Riha de kenî ra veradê. Riha tarîx de vera Nemrudan de sere nêronayo. Cok ra destê xo Riha ra biancê.”
MA/RIHA