Qerarê rijnayîşê taxê Alîpaşa û Lalebeyî yê qezaya Sûrî ya Amedî ke çarçeweya ‘bedilnayîşê bajarî’ de amebî girewtiş, roja 22. de dewam keno. Roja 23ê gulana ke rijnayîş dest pêkerdo ra nata awe û cereyan nêdîyeno şarê nê taxan. Şar zî dîyar keno ke do taxanê xo canêverdî. Babete ser o Hemverfeka Blokê Aştî Zelal Ekîncîye derheqê rijnayîşî de vînayîşê xo arde ziwan û vengdayîşê vindarnayîşê rijnayîşî kerde.
Ekîncîya ke rijnayîşî şopnaye, rijnayîşî ser ro wina va: “Qezaya Sûrî seba Amedî zaf muhîm a. Rîyê Amedî mîyanê serran de zaf bedilîyayo. Labelê Sûr vera nê bedilîyayîşî de xover dayêne. Tîya de dîyayîşê rijnayîşî û goşdarîkerdişê hîkayeyanê şarî zaf dejin o. No rijnayîş yeno manaya çinkerdişê cuya tîya. Tîya cayêko zaf taybetin o. Şeklê nê ziqaqan û têkilîyê merdiman ti cayêko bîn de çin o. Wexto ke merdim tîya bicuyo û bivîno, hîna zaf bi tesîr beno. Seba ke merdim bişînbo nê rijnayîşî bivindarno, ganî merdim bikewo hereket mîyan.”
Ma do bibî vengê înan
Ekîncîye dewamê qiseykerdişê xo de wina va: “Ganî şarê ke rojawanê Tirkîya de cuyenî zî vera rijnayîşê Sûrî de hesas têbigêrî. Ma eşkenî vera rijnayîşî de xo biresnî merdimanê wijdaninan. Hedefê ma yê tîya de o yo ke ma bişînbî ewja ra heta ê cayan vengê xoverdakaran biresnî.”
Ekîncîye bale ante rijnayîşî ser û wina va: “Rijnayîşo ke tîya de yeno kerdiş, her mana de rijnayîş o. Şar bi hawayo zorî cayê xo ra yeno vetiş. No rijnayîş sey qetlîyamêko tarîxî yo. Nê cayî heme ameyî îstîmlaqkerdiş. Tîya de tarîxêko 7 hezar serreyî esto. Ma do destûr nêdî ke tarîxêko winasî bêro rijnayîş. Ganî ma bipawî.”
Ganî her kes çîyêk bikero
Ekîncîye peynîya qiseykerdişê xo de veng daye şar: “Ganî merdimê wijdaninî vengê xo berz bikerî û no rijnayîş bêro vindertiş.“
ŞÛJIN/AMED