Merkezê Cigêrayîşanê Sosyal û Sîyasalan (SAMER) wextê qedexeyê tebervejîyayîşê kuçeyan de 4 hezar û 144 kesê ke Sûrî ra ameyî koçkerdiş reyde anketêk viraştbî. No anket derheqê netîceyê koçî de tayê malumatan dano ma. Kesê ke seba anketî înan reyde pêvînayîş ameyî kerdiş, se ra 5.5ê ci qerarê îstîmlaqkerdişî tesdîq kenî, labelê se ra 94.5ê ci zî nê qerarî qebul nêkenî.
Se ra 29.3ê vera qerarî yî
Reyna se ra 29.3ê nê kesan seba ke biagêrî keyeyê xo vera nê qerarî de yî, se ra 29.2ê ci seba ke peyser biagêrî cuya xo ya verêne qebul nêkenî. Se ra 13.3ê nê kesan seba ke qerarê îstîmlaqî şaş vînenî, nê qerarî ra vanî nê.”Se ra 10.1ê ci seba ke teberê Sûrî de cuye vaye yo û nêşênî bicuyî, qerarî qebul nêkenî. Se ra 9ê nê kesan zî îstîmlaqkerdişî sey xespkerdişê heqan vînenî û nê qerarî qebûl nêkenî. Se ra 2.4ê nê kesan hem qerarî qebûl nêkenî û hem zî raybazê qerarî raşt nêvînenî, cok ra vanî nê. Se ra 1.1ê ci zî seba ke do tarîxê Sûrî xira bibo vano ‘ya’. Tena se ra 5ê nê kesan nê qerarî raşt vînenî; ê înan zî seba ke keyeyêko newe pawenî wina fikirîyenî.
Dewamê ê wextî yo
Babete ser o Endama Heyetê Îdareyî ya SAMERî Yuksel Gençe qisey kerde. Gençe vist vîrî ke na xebate mabênê 2015 û 2016î de amê ramitene û va: “Ma xebata xo de kesê ke ca û warê xo ra ameyî koçkerdiş, esas gênî.” Gençe bale ante rijnayîşo ke nika taxanê Alîpaşa û Lalebeyî de yeno kerdiş ser û wina va: “Qedexeyan ra dima sifteyîn 6 taxî rijîyayî. Wexto ke ma dest bi na xebate kerde, o wext qedexeyê tebervejîyayîşî hema nêwarîştbî û abluqa hîna dewam kerdêne. Her çiqas ke wina bî, reyna zî agêrayîşî dest pêkerdbîy. Nika cayê ke hema yenî rijnayîş, teberê nê cayan de her kes agêrayo keyeyê xo. Bado ke rijnayîş Alîpaşa û Lalebeyî de dest pêkerd, kesê ke agêraybî ca û warê xo, reyna yenî koçkerdiş.”Gençe peynî de va ‘yê ke vera îstîmlaq û rijnayîşî de vejîyenî, yê serranê 90î de dewanê xo ra ameyî koçkerdiş î’.
AMED