Derheqê netîceyanê referandûmî her ke şino reaksîyonî benê berz. Jew nêrazîbîyayîş zî cinîyê Sêrtijan ra ame. Cinîyan day zonayen ke rixmê pêrokîn bêhiqûqî û xespî reyna zî şarî qezenc kerd. Hemsereka HDPyî ya Bajarê Sêrtî Necîbe Îlhane vist vîrî ke netîceyê referandûmî de şarî qezenç kerd.
Îlhane hayr ant zilmê AKP ser û wina dewam kerde: “Seba ke ma xebate nêkerî, parlamenter, hemserekê şaredarîyan û embazê ma yê xebate tewqîf kerdî. Labelê nê tewqîfkerdişî vernîya ma de nêbî asteng û her çiqas ke hende çîyî ameyî kerdiş, reyna zî ma qezenç kerd. Ma wazenî êdî wa gonîye nêrijîya. Ê se kenî wa bikerî, do aştî qezenç bikero.”
Wa cinîyî nêtersî
Îdarekara HDPyî ya Sêrtî Şehrîban Îlgene zî va ‘ma rêjeya ke pawitêne ra hîna zaf reyî girewtî’ û wina domnaye: “Înan hewl dayî ke bi hîle reyan ma ra bigirî. Ma do têkoşînê xo bidomnî. Bawerîya ma bi têkoşînê ma esta. Ma heta nika qet sere nêrona û ma do nêronî zî.”
Îdarekara HDPyî ya Sêrtî Ayten Elçîçeke zî va ‘ma bi aşman xebate meşna’ û wina qedênaye: “Netîceyê ci de se ra 52 nê vejîya. Labelê seba ke Heyetê Weçînayîşî yê Berzî (YSK) zurî kerd, nê vinî kerd. Ma cinîyî HDPyî yê Sêrtî payan ser de yî. Tirkîya de têkoşîno ke biedalet nîno meşnayîş. Siloganê ma dîyar o, ma do bi tesilî qezenç bikerî.”
ŞÛJIN/SÊRT