METÎN YOKSU / MA / SÊRT
Ekonomîya bajarê Sêrtî de fistiq cayêko muhîm gêno û emser xesadê fistiqanê Sêrtî dest pêkerd. Berardoxî emser germî û ziwatîye ver mehsulî ra berdarîye nêgirewtî. Projeyanê HESî ver emser rutubet zêde bi û berdarîya fistiqan zî kewte. Ziwatîye ver bi tonan fistiqî gileyê daran de mendî. Emser 20 hezar ton fistiqî yenî pawitene. Fistiqî bexçeyan ra vayîya mabênê 30 û 40 TLyî de yenî rotene û dezgeyan ser o na vayîye heta 100 TL vejîyena.
Berardoxan ra Zekerîya Daşçiyî dîyar kerd ke fistiqêrê ci yê 20 serreyî estî û wina domna: “Ez reya sifteyîne ya ke ziwatîyêka winasî vînena. Ma xeylê daran de dest nêda fistiqan. Reyna fistiqêrî rutubetê barajan ra zaf tesîr bîyî. Wina bîyo ke ma kîloyê fistiqan ra 5 TL daxî qezenç nêkenî. No rez ra pêro pîya 5 ciwalî fistiqî mendî. Mîyanê fistiqan veng o. Ganî destek bidîyo berardoxê fistiqî.”