19ê Tebaxe de Şaredarîyê Bajarê Girdî yê Amed, Wan û Mêrdînî hetê hukmatê AKP û MHPyî ra ameyî xespkerdene û herinda şaredarê ke bi îradeya şarî weçînîyayî de qayûmî ameybî tayînkerdene. Roja ke qayûmî tayîn bîyî û şaredarîyî ameyî xespkerdene ra nata çalakîyê protestoyî dewam kenî.
Bi taybetî Amed de Cadeyê Lîse yê Yenîşehîrî de 13 rojî yo ke bêmabên çalakîya roniştişî yena viraştene. Çalakgêrê ke beşdarê çalakîya roniştişî bîyî, silogananê ‘Amed yê ma yo, do yê ma bimano’, ‘Ma do bi xoverdayîşî qezenç bikerî’, ‘Heq huqûq edalet’ û sewbîna eştî. Xeylê parlamenterê HDPyî, hemserekê şaredarîyan, endamê Kongreya Îslamo Demokratîk û xeylê dezgeyê cinîyan zî destek da çalakîye.
Cinîyê ke seba destekdayîşê çalakîye ameyî, bi cinitişê fîtik, vatişê deyîran û siloganan beşdarê çalakîye bîyî û destek da çalakîye. Cinîyan wextê rayîrraşîyayîşî de siloganê ‘Cinî cuye azadî’ eştî. Polîsan destûr nêda ke rojnamegerî wextê rayîrraşîyayîşî de fotograf yan zî dîmen biancî. Badê ke cinîyî resayî cayê çalakîye, pankarto ke ser o ‘Hemserekîye xeta ma ya more ya’ nuşte bî, akerd.
AMED