“Hemverê hêrişê qirkerdişan vero ma semedê ke asayîşê şarê xo bireyek inasarên ma girewt. Rayna hîna ezaya şarê ma estbî û wexto ke wina de viraştişê mîtîngan çîyo ke raşt zî nêbî. Him hetê merdimî de û hem zî hetê exlaqî de viraştişê mîtîngan ma raşt nêdî. Ma bawer kenî ke ma bireyekî raşt girewto.”


Rî bi rî xebetyenî

Yuksekdag dergeyîya qalîkerdişê xo de dîyar kerd ke herinda mîtîngan ma hewl danî ke şarê xo reyde rî bi rî qalî bikerî û wina vat: “Tîya de hemserekê ma û heme xebatkarê ma bêr bi bêr, papole bi papole gêrenî. Şarê ma reyde rî bi rî pêvînayîş kenî. Ma nêy pêvînayîşanê ma de çîyo ke ez veynena; şarê ma hemverê HDPe zaf germin nêzdî beno. Xora qirkerdişî ra dima hetê yewbîyayîşî de yewbîyayîşek gird virazîyayo.”

 

Ma rayan do vêşî bikî

Yuksekdag vat ke ma 1’ê Teşrîne de tewr kêm sera 15 rayan do bigîrî û wina verdewam kerd: “Ma bawer kenî ke 1’ê Teşrîne de êy ke nêy qirkerdişan ra serkewtiş pawenî, do şaş bimanî û vinî bikerî. Goreyê encamê cigêrayîşê ma vejya werte ke ma her cayî de humara rayanê xo pawenî. Hetê nêyî de merdimê newe dormarê partîya ma de benî kom. No zî semedê ma çîyo ke muhîm o. Finak Samandagiya Hataye cayo ke ma rayê xo tede vêşî kerda ra yew a. Semedê xebatan hetê xebatkarê ma de merdimê ke awayo zerrî xebetyenî zî vecyayî werte. Hetê taxmînkerdişê encamî zî ez vana ma do sera 15 û serê ci de rayan bigîrî.” 


Şar ma nîşan da

Yuksekdag dergeyîya qalîkerdişê xo de bal ant ser awankerdişê koalîsyonî û wina vat: “Ger ke bade weçînayîşê 1’ê Teşrîne de awankerdişê koalîsyonî ma sero ferz bibo, goreyê partîyanê bînan ra ma CHPe rey awankerdişî semedê Tirkîyaye çîyo ke hîna başêr veynenî. Yeno zanayîş ke 7’ê hezîrane de CHP sey muxalefetê maye amey weçînayîş. HDP zî rayê xo zaf vêşî kerdî. No semedî ra ma û CHP eşkenî koalîsyonî awan bikî. Xora şarê Tirkîyaye zî bi rayanê xo no nîşan dayo. Xora cayo ke ma şonî de şar waştişê xo yê no hetî de ma ra vano. Ma goreyê waştişê şarê xo awankerdişê koalîsyonî ra akerde yî.”


Îxtîmalê hêrişan esto

Yuksekdag qalîkerdişê xo de derheqê provokasyonan de ciresna ke ma qirkerdişê Enqereye ra dima vergirewtişê mecîdî girewtî û wina vat: “Raşt o îxtîmalekî inasarên esto. Çimkî no weçînayîş weçînayîşeko zaf krîtîk o. Xora rayvistişê ke girêdayê qesrî xebetyenî, 7’ê hezîrane ra heta nika hêrişê şarî kenî. Heta nika her awayî polîtîkayê lêminî amey xebetnayîş. Hezey ke şima zî zanî yew hewte verîya weçînayîşê 7’ê hezîrane zî hêrişî ameybî kerdiş, no sero îxtîmala ke rayna bikerî esto. Ma zî hemverê nînan do bi haydar bibî û xebatê xo zî no çarçiwe de bidomnî.” 


Weçînayîşekî dîrokî yo

Yuksekdag qalîkerdişê xo de bal ant ser wayîrvejyayîşê sindoqan û wina domna: “Lazim o şarê ma kura de benî wa bibî, wa şêrî sindoqan ser. Rayna hetê wayîrvejyayîşê sindoqan de lazim o şarê ma sindoqanê xo ra wayîr bivejyo. No weçînayîş beyntarê dîktatorî û demokrasîye de vîyareno. Semedê qezenckerdişê aştî û demokrasîye, weçînayîşekî dîrokî yo. No şer heme semedê ke şîyîşê şarî ya sindoqan ser asteng bikerî, yeno kerdiş. Rayna semedê ke AKPe tena serê xo biba îqtîdar, no weçînayîş yeno kerdiş. Lazim o ma nêy planan biveynî û 1’ê Teşrîne de nêy planan veng bivejî.”


Wa bi kerb vajî HDP

Yuksekdag tewr peynî wina vat: “Heta nika ma hemînan wezîfeya xo kerd, lazim o heta 1’ê Teşrîne zî çîyo ke keweno ser milê ma, ma bîyarî ca. No weçînayîş eşkeno bibo weçînayîşê serkewtişî. No semedî ra ma wazenî ser nameyê şaran no weçînayîş bibo weçînayîşê serkewtişî. No şar hende zilm vîna û hêsir çiman ra war kerd, lazim o ma zî hemverê nêy zilm û hêsiran serkewtişî dest bifînî û no zî deynê milê ma yo. Lazim o şarê ma bi kerb bişêro sindoqan ser û bi kerb bivajo HDP.”  


 NAVENDA XEBERAN