Festîvala Kultur û Tebîetî ya Muzirî ya 19. vizêr roja 3. de Kuçeyê Hunerî de bi deyîranê hunermend Kerem Sevînçî qedîyaye. Goşdarîkerdişê muzîko ke saetêk dewam kerd, bi eleqedarîya girde ame temaşekerdene.
Heto bîn ra çarçewaya festîvale de beldeyê Perî yê Dêrsimî de zî aktîvîteyê ke 2 rojî dewam bikerî, ameyî destpêkerdene. Çarçewaya festîvale de belde de fotografê ke qala beldeyî kenî û haletê ke verê cû zîret de ameyî bikarardene, ameyî nîşandayene.
Parlamenterê HDPyî Mûrat Çepnî, Alîcan Onlu, Kemal Bulbul, Hemserekê Şaredarîya Perî Orhan Çelebî û Songul Dogane û xeylê kesî beşdarê aktîvîteyan bîyî. Hemserekê Şaredarîye Çelebî û Dogane şarî rê sipas kerd û da zanayene ke belde şenik o labelê karê înan zaf o.
Ma do bierzî eştegehî
Parlamenter Çepnîyî zî va ‘ma ewro sîyasetê yew merdimî de têrî yî’ û wina domna: “Ma do no sîyaseto ke kayyuman dir hereket keno, bierzî eştegehî. Ma şaredarîyî girewtî û ma îradeya şarî teslîmê şarî kerd. Ma mecbûr î ke bi meclîsanê şarî îdare bikerî. Ma hetê îdareyê xoserî de seferberî îlan kerda. Na festîvala ma no sîyaset rê bî cewab.” Alîcan Onluyî zî dîyar kerd ke ê na festîvale tena seba 2 domanan nê, heme domanan rê virazenî û wina domna: “Tayê embazê ke na festîvale de keda înan esta, nika zindan de yî. Ma esîrîra înan şermizar kenî. Tirkîya de heme mergî netîceyê şerê lêminî de benî.”
Qiseykerdişan ra dima beşdarvanî parke de sergî gêrayî û muzîk goşdarî kerd.
DÊRSIM