Hemsereka HDPyî ya qezaya Pasûrî Selvî Akkoyûne derheqê tayînbîyayîşê qayûmî yê Şaredarîya Pasûrî de de va ‘Planê qayûmî wexto ke Wezîrê Karanê Zereyî Suleyman Soylû ame tîya ameyo kerdene’ û wina dewam kerde: “No bi hawayo aşkere komplo yo. Seba ke qayûm tayîn bibo, 7 kesî kerdî qurban. Ma do qayûmî qebul nêkerî.”
12ê Êlule de dewêka Pasûrî de teqayîşêk qewimîyabi û netîceyê teqayîşî de 7 kesî merdbî û 10 kesî zî birîndar bîbî. Kesê ke merdbî mîyan de qoricîyî zî estbî. Teqayîş ra dima Şaredarîya Pasûrî amebî xespkerdene û herinda hemşaredaran de qayûm tayîn bibi.
Badê ke qayûm ame tayînkerdene, polîsan eşt bînaya qezaya Pasûrî ya HDPyî ser û dest nabi computuranê ser, dima ra bîlboardanê reklamî yê qeza de nuşteyê sey ‘Şehîdî nêmirenî, welat parçe nêbeno’ amebi nuştene. Tayînbîyayîşê qayûmî ra ver Wezîrê Karanê Zereyî Suleyman Soylû şibi qeza zîyaret kerdbi û şîyayîşê Soylû ra dima qayûm amebi tayînkerdene.
Hedîse ra dima ame musayene ke qoricîyan şarî tehdîd kerdo. Hemsereka HDPyî ya Pasûrî Selvî Akkoyûne hedîse ser o qisey kerde û melumatê muhîmî pare kerdî. Akkoyune daye zanayene ke planê qayûmî wexto ke Soylû şîyo qeza ameyo kerdene.
No bi hawayo aşkere komplo yo
Hemsereka HDPyî Akkoyûne seba keyeyanê 7 kesan serweşîye waşte û wina va: “Yeno vatene wesayîtê şaredarîye nizdîyê cayê hedîseyî de ameyo dîyayene. Labelê wesayîtê şaredarîye seba xizmetê şarî yenî bikarardene. Her şaredarîye de wina yeno kerdene. No bi hawayo aşkere komplo yo. Seba ke qayûm tayîn bibo, 7 kesî kerdî qurban. Wa Homa înan rê nêverdo.”
Akkoyûne dewamê qiseykerdişê xo de bale ante zîyaretê Soylû yê qeza ser û daye zanayene ke qayûm nê zîyaretî ra cîya nîyo. Akkoyûne va ‘eke destê înan de delîlî estî, wa nîşan bidî’ û wina dewam kerde: “Ez serran o ke Pasûr de hemserekîye kena û ez her kesî şinasnena. Seba ke Pasûr verpêdî, no ameyo kerdene. Wexto ke Soylû ame tîya ra dima wina ame kerdene. Herkes heme çî vîneno. Keyeyê welatîyanê ma zî baş zanî ke HDP nêyî nêkerdo. Ê zî zanî ke seba ke qayûm tayîn bikerî no ameyo kerdene. Ma do qayûmî qebul nêkerî.”
Şaredarîya Qereyazî zî ameye xespkerdene
Heto bîn ra Hemşaredara qezaya Qereyazî ya Erziromî Melîke Goksû ya ke cezaya ci ameye tesdîqkerdene, ameye tepiştene, herinda ci de qeymeqam Mesût Tabakcioglû sey qayûmî ame tayînkerdene. Îqtîdarê AKPyî ke nêşêna şaredarîyanê Kurdan bigîro, hewl dano bi sebebanê ercanan şaredarîyanê Kurdan xesp bikero. Heta nika şaredarîyê bajarê girdî yê Amed, Wan, Merdîn û Pasûrî ameyî xespkerdene û herinda hemşaredaran de qayûmî ameyî tayînkerdene.
AMED