Rayberê Şarê Kurdî Abdullah Ocalan 4ê Nîsane 1949 de dewa Amara ya qezaya Xelfetî ya Riha de ameyo dinya. Na roje seba şarê kurdî zaf muhîm a; cok ra şarê kurd roja 4ê Nîsane sey roja newe ra welidîyayîşî vîneno û şar nê semedî ra bi munasebetê 4ê Nîsane çalakîyan virazeno. Bitaybetî 4ê Nîsane de çar parçeyanê Kurdistanî, Ewropa, Rojhelato Mîyanên û sewbîna xeylê cayan de rojbîyayîşê Rayberê Şarê Kurd Abdullah Ocalanî yeno pîrozkerdiş. Babete ser o Hemsereka Heyetê Îdarekarî ya Federalîya Demokratîke ya Vakurê Sûrîye Foza Yusufe qisey kerde.
Heyetê Îdarekarî ya Federalîya Demokratîke ya Vakurê Sûrîye Yusufe dîyar kerde ke ‘Rayberîye bi felsefeya xo her tim seba kurdan bîyo roşnîyêk û şarê kurd zî bi têkoşîn û xoverdayîşê xo Rayber Apo resna dûştê xoverdayîşî’.Yusufe qiseykerdişê xo 4ê Nîsane roja rojbîyayîşî seba heme cinî û domanan pîroz kerde û wina va: “Rojhelato Mîyanên de xeylê çalakîyê muhîmî qewimîyayî. Tarîxê merdimîye de bajarê Riha seba xeylê şexsîyetanê namdar, gird û pîrozan meymandarî kerdo û bîyo cayê welidîyayîşê înan. Nê kesan mîyan ra yê ke vejîyayî, Pêxemberanê pîrozî ra dima yewe zî Rayber Apoyo ke seba kurdan bîyo roşnîyêk o. Rayberîye destpêka cuya xo ra heta ewro her tim bîyo şopdarê heqîqetî û kewto raştîye dima. Rayberîye hîna domanîya xo de dest bi meşîyayîşê heqîqetî kerdo û hedefêko gird dayo vernîya xo.”
Roja welidyayîşî
Yusufe dewamê qiseykerdişê xo de bale ante ser muhîmîya rojbîyayîşê Rayberê Şarê Kurdî Abdullah Ocalanî ser û wina dewam kerde: “Rayber Apo û embazê ey seba azadîya şarê kurd bi canê xo têkoşîn dayî. Şarê kurd bi saya felsefeya Rayber Apoyî resa dûştêka estene û felsefeya ci Rojhelato Mîyanên û pêroyî Kurdistanî ser de vila kerd. Cok ra kurdî muhîmîy danî Rayberê xo û 4ê Nîsane sey roja welidîyayîşî vînenî.”
Saya ci de bîyî
Yusufe peynîya qiseykerdişê xo de bale ante serkewtişê cinîye û qiseykerdişê xo wina domna: “Şorişê cinî, şorişê şaran, şorişê Rojawanî netîceyê keda Rayber Apoyî de bîyî. Astengî û pawitişê bajarî bi saya felsefeya Rayber Apoyî de bîyo. Rojawan de fikir û felsefeya Rayberîye tena bi cinîya kurde ra girêdaye yo. Ewro bawerîya her kesî bi têkoşîn û hêzê cinîye esta. Bitaybetî Rayber Apo seba cinîyan wayîrê muhîmîyêka girde yo û cinîye erj û qîmet danê Rayberîya xo. Ez 4ê Nîsane seba heme cinîyê Kurdistanî û cîhanî pîroz kena û wa heme cinîyî bibê şopdarê Rayberê Şarê Kurd Abdullah Ocalanî û hewl bidî felsefeya Rayber Apoyî fam bikerî.”
Rayber Apo seba azadî xover dano
Yusufe qiseykerdişê xo de qala felsefeya Rayberê Şarê Kurd Abdullah Ocalanî kerde û wina va: “Felsefeya Rayber Apoyî seba merdimîye ya. Bingeyê felsefeya Rayber Apoyî de exlaq û azadîya komelî esto. Labelê dewletê neteweyî na felsefe qebul nêkerdî û şexsê Rayberîye de heme şarê kurd mîyanê çar dêsan de hepis kerdî. Labelê Rayber Apo nê 18 serrî yo ke seba cuyêka azade û exlaqin vera zext û zordarîyan de xover dano û felsefeya xo bi şar dano şinasnayîş. Ma do qet nêvajî Rayberê ma tewqîfkerde yo; çimkî Rayberîye bi fikir û felsefeya xo azad o û felsefeya xo teslîmê dişmenî nêkerdo. Eke ewro Rojawan de şorişêk awan bîyo, no saya Rayber Apoyî de yo.”
ANHA/QAMIŞLO