Endama Komîteya Ekonomî ya TEV-DEMî Dilşa Efrîne derheqê awankerdişê komîteya ekonomî de fikrê xo arde ziwan. Efrîne va ‘Ma sifteyîn xebatê ekonomîye rêxistine kerd’ û qiseykerdişê xo wina domnaye: “Seba nêyî zî ma ewil qerar da ke meclîsê ekonomîye awan bikerî. Labelê ma dîy ke vernîya ma de problemêko gird esto. Çimkî ekonomîye şaş ameyêne fam kerdiş; çimkî ekonomîye sey pere û kar ameyêne famkerdiş. Reyna xebatan de zîhnîyetê îqtîdar û dewlete zaf zêde bî. Bitaybetî hetê zîretî de bêbawerîyêka gird estbî. Ma seba şikitişê nê zîhnîyetî seba akademîye lazimîye vîna.”
24 kesî beşdar bîyî
Efrîne dewamê qiseykerdişê xo de va ‘ma ronayîşê akademîye ra dima dest bi perwerdeyî kerd’ û wina va: “24 kesî beşdarê perwerdeyî bîyî û nêyî zî yê ke meclîsê ma de ca girewtî yî. Kesê profesyonelî yê ke perwerde bidayêne zî çinêbî. Ma munaqeşeyê cîdî viraştî û perwerdeyê ma yê sifteyîn heme zî dersê teorîk bî. Ma perwerdeyê bingeyî ra dima nika hetê branşî de zî perwerde danî. Rojawan de falîyetê ekonomîye aver şonî û nê averşîyayîşî de rolê perwerdeyî zî gird o.”
Pratîk xurt o
Efrîne va ‘heta nika ma endamê xo yê meclîsî perwerde kerd’ û qiseykerdişê xo wina qedênaye: “ Kesê ke nê perwerdeyan ra derbaz benî, hîna biberpirsîyar hereket kenî. Ma perwerdeyî tena akademî reyde sînordar nêkenî, ma do waran de zî hem teorîk û hem zî pratîk de perwerde bivînî. Akademîya ma serra 2014 de abîye la hîna zî prosesê awanbîyîşî domîyeno. Ma hewl danî ke goreyê lazimîyanê xo hîna profesyonel hereket bikerî. No het de ma yewna akademîya ekonomî ya komelkî Kantonê Efrînî de zî akerd labelê seba ke şert û mercî nêronîştî, ma Kantonê Kobanê de hema nêakerdo.”
ANF / DÊRIK