Ewro 4. Serragêrê Şoreşê Rojawa yo. Nê 4 serran mîyan de şarê kurd yê Rojawa îmze eştî bin serkewtişê girdî û pêrokîn dinya rê moderê sîstema xoser ya demokratîk ronay. Tewr peynî de bi îlanê QSD, MSD û Federasyonê Demokratîk yê Bakûrê Sûrîye Şoreşê Rojawa bi malê pêrokîn şaran.
Serra 2012 de Sûrîye de kaos bi xorîn û pirodayişî destpa kerdî. Eynî wext de mudaxaleyê quwetanê teberîn zî bi pîl. Welatî mîyan de zî komê cîya cîya yê bi tifingî vejyayî. 18ê Tîrmeh 2012 de xêlê fermandarê rejîmê Baas amey kişten. Badê na bîyayiş herkesî pawit ke rejîm biwelişyo. Eynî roj komanê muxalîf yê bi tifingî sûkanê Cerablûs û Minbic rejîm ra girotî. Badê nayî Quwetanê Pawitişê Şarî (YPG) kewt dewre û 19ê Tîrmeh 2012 de Kobanê rejîm ra girot.
Bi xelesnayişê Kobanê ra pîya kila adirê şoreşî vilayê pêrokîn Rojawa bî. 21ê Tîrmeh 2012 de Dêrîk û dewê ke çormeyê ci de yê amey xelesnayen. Peycoy Efrîn, qezayê ci û sûkê bîn yê Rojawayê Kurdistanî jû bi jû destê rejîmî ra xelesnîyayî. 19ê Tîrmeh 2012 de Fermandarîya Pêroyî yê YPG xo îlan kerd û sozê pawitişê pêrokîn şaran da. No sozê xo pratîk de bi xoverdayişekê gird îspat kerd.
Çimeyê sîstema xoser
Çend rojan miyan de, rayverînê Quwetanê Pawitişê Şarî YPG de, Efrîn, Serêkaniyê, Dirbêsiyê, Amûdê, Dêrik, Girkê Legê, Tirbespiyê û Tiltemîr girotiyay binê qontrolî. 4 serrê tekoşîn û xoverdayişî yê Rojawayê Kurdistanî de, warê pawitiş, siyasî, sosyalî, ekonomî, dîplomasî, kultur û ziwanî de destkewtişê girdî vetî werte. Şoreşê 19ê Tîrmeh heme şarê Rojawayê Kurdistanî girot xo miyan û bi hîmê, çimeyê ronayişê sîstema xoserîya demokratîkî û omidê weşîya azad û têdûşt kerd gird.
Îlanê Kantonan
Peyniyê Kanûna 2014 de zî, şoreşê Rojawa kewt merhaleyêda newî. Çarçoweyê şoreşê Rojawa de, 21ê Kanûne 2014 de Kantonê Cizîre, 27ê Kanûne de Kantonê Kobanê û 29ê Kanûne de zî Kantonê Efrîn îlan bî. Rayverînê her 3 kantonan, vera heme êrişanê îşgalkar û çeteyanê DAIŞ, xo heme hetan ra rêxistin kerd û heme hetan ra serva (qandê) heme waştenanê welatijan bî cewab. Rayverîna Xoserîya Demokratîk warê perwerde û pawitiş ra hetanî heme warê weşî, xizmetê şarî kerd û projeyê girdî vistî dewre. Kanton û sûkê Rojawa bî cayê weşîya azad ê şaran, bawerîyan û kulturanê cîya.
Roj bi roj xoverdayişê YPG/YPJ
Şoreşê Rojawa de, çiyê bînê tewr muhîm zî, xoverdayişê Kobanê yo. Çeteyanê DAIŞ 15ê Îlona 2015 de, 3 hetan ra, bi tifînganê giran û destegê dewleta tirk êrişê Kobanê kerd. Hedef kerdî ke cayo ke, şoreşê Rojawa destpa kerd de şoreşî bifetisnê, wedarnê. La nê hesabê leyminî (qilêrîn) vistîyayî dîwarê xoverder yê Kobanê. Kobanê bi xoverdayişê tarîxî darbeyê girdî day çeteyanê DAIŞ ro û vengê kurd û Kurdistanî resna pêrokîn dinya. No xoverdayişî vernîyê veracêr şîyayişê DAIŞ akerd û Kobanê kerd mezelê çeteyanê DAIŞ. Quwetanê YPG û YPJ roj bi roj vera heme êrişanê çeteyan û îşgalkaran xoverda û vernîya cuya azad û têdûşt akerd.
Kantonê Cizîre û Kobanê resyay pê
YPG û YPJ Hezîrana 2015 de zî îmze eşt binê jû serkewtişekê girdî, Girê Spî xelesnay û bi nayî Kantonê Cizîre û Kobanê resnay pê. Quwetanê Pawitişê Şarî YPG peynîyê serra 2015 de zî, vera heme tehdîtanê Tirkîye gama bîn ê tarîxî eşt. YPG dest bi hamleya xelesnayişê Tişrîn kerd û bi ravêrdinê royê Firatî, Tişrîn û dewê ci xelesnay. Ravêrdişê royê Firatî zî, şoreşê Rojawa de, wayîrê maneyê gird û werte ra hewadayişê xetanê sûr ê dewleta tirk bi.
1ê Hezîrana emserr de zî bi rayverînê Meclîsa Lejkerî yê Minbic de, hamleya xelesnayişê Minbic destpa kerd. Bi desan dewê Minbic û leteyê gird yê mîyanê sûk zî çeteyan ra xelesnîya. Nika quwetê eskerî hewl danê Rojawa bi temamî çeteyan ra pak bikerê û Kantonanê Kobanê û Efrîn biresnê pê.Rayverê sîyasî zî, bi projeyê Federasyonê Bakurê Surîye, hewl danê Rojawa û Bakurê Surîye, açarnê baxçeyê azadî yê şaran.
NAVENDÊ XEBERAN
KCK şoreşî fîraz kerd
KCK pê yew mesaja serrçarnayina Şoreşê Rojava piroz kerd. Eşkerakerdiş de vaciya ke ûnînê Tekoşînê Kobanê de rûhê 14 Tirmeh esto.
Henserokiyê Konseyê Rayverîn ê KCK pê yew eşkerakerdişa niştkî, serrgerayina Şoreşê Rojava bimbarek kerd.
Eşkerakerdiş de hayr ancîya emegê Rayverê Şarê Kurd Abdullah Ocalanî ser û ca diya nê zûnayişan: Şoreşê Rojava ke pê emeg 20 serrin ê Rayver APO ame meydan, hama inkê ra pêroyê şaran re biyo roşnayiyê omidî. No şoreşo erciyayê vernî de Rayver Apo, şarê ma û pêroyê merdimiye re bimbarek bo. KCK şehîdê Şoreşê Rojava zî yad kerdî û sozê giredayine xo kerde newe.
Pêroyê Sûrîye rê demokrasî
Eşkerkerakerdiş alaqa ûnciya muhînê piya hareket kerdişê şaran ser û vaciya ke, Kurd, Ereb,Turkmen, Asûrî-Sûryanî, û Erminiyan paşt da yewbîn û kewtî ser. KCK arde zûne ke, tekoşînî Kobanê tekoşîno degmeyan ra yo û ûmînê nayê de ruhê 14 ê Tirmeh esto. KCK dewamê eşkerakerdiş de nê zûnayîşî bar bî: Êr Halep, Minbiç, Heseke û Bakûr ê Sûriyê de tekoşîno erciyaye diyeno. Çarçîwayê înşayê demokratîk de, meclîs û komînî niyenî ro. Şoreş na çarçewe de xo resneno, keno vila û geno binê tivarî. KCK arde zûne ke, serrê 5. de Şoreşê Rojava hamleyê Fermandar Ebu Leya de pêroyê Sûrîye rê demokrasî ano û sozê paştdayene da ci.
ANF/BEHDÎNAN