SUREYYA AYDIN / SERÊKANIYÊ - ŞÛJIN
Barajanê Rojawanî ra Serêkanîyê de seba ke lazimîya komelî ya weşîye bivîno, Akademîya Weşîya Rojawanî ameye akerdiş. Sûrîye û Rojawan de reya sifteyîn a ke akademîyêka weşîye yena akerdiş.
Akademî de ewil do dewreya hemşîretîye bêro dayîş û dima ra zî do sey 3 serrî û 4 aşmî zî dewreya doktorî bêra akerdiş. Akademî 40 kesan ra pê yena û zafaneyê ci cinî yî. Akademî de heme dersê doktorîye yenî dayîş, labelê herinda îmtîhanan de raybazê cîya-cîya yenî şuxilnayîş.
Babete ser o doktor û wendekarî qisey kerdî.
Doktor Hemîd Tekînî va ‘Ma do cerahî ra heta heme beşanê bînan doktoranê xo amade bikerî’ û wina domna: “Ma do tena nêweşan tedawî nêkerî, sebebê vejîyayîşê nêweşîyan û rayîranê vernîgirewtişê nêweşîyan zî bivînî.”
Doktorê pisporî estî
Wendekaran ra Sîyam Îsaye zî va ‘ez Kobanê ra ya û no 2 aşme û nîm o ke ez tîya de perwerde vînena’ û wina domnaye: “Ma sifteyîn felsefeya weşîye dî û dima ra zî ma derbazê perwerdeyê weşîye bî. Ma hem perwerdeyê teorîk û hem zî pratîk vînenî. Zaf cayan ra doktorê pisporî yenî û perwerde danî ma.”
Wendekare Evîn Ebdoya ke Kobanê ra ameya zî wina va: “Ez weşîye ra hes kena, prosesê Kobanê de tecrubeyêkê ma çinêbî. Ma zaf zehmetî ant. Cok ra mi waşt ez feydeyêk bida komelî. Mi 8 aşmî karê laboratuvarî kerd. Ez wazena xizmetê şarê xo bikera. Tîya de îmtîhan o, labelê temamkerdişê zanayîşî esto. Ma çiqas rew bimusî, ma do hende bibî pispor.”
Lazimî bi kesêko bîn çin a
Mizgîn Huseyîne zî wina va: “Hedefê mi o yo ke ez karê weşîye de cayê xo bigîra. Ez domanîya xo ra nata wina wazena. Ma karê îdareyî de zî ca gênî. Ma xo bi xo îdare kenî. Komunê ma estî; 3 komunê cinîyan û 2 komunê camêrdan estî. Lazimî çin a ke ti kes ma îdare bikero. Ma wazenî bi rengê cinîye karê weşîye bikerî. Ma do akademîya xo de dersê Jineolojîyî zî bivînî.”