Awankar û Serekê Rêxistina Xizmetê Weşîye û Vera Feqîrîye de Prof. Dr. Gerhard Trabertî derheqê ambargoyo ke vera Rojawanê Kurdistanî de yeno domnayene ser o qisey kerd û tespîtê muhîmî kerdî.
Traberto ke bi desan reyan şîyo herême û herême de cigêrayîşî kerdî, tewr peynî aşma temmuze de bi ekîba xo şibi Rojawan. Trabertî va ‘hetêk ra rejîmê Erdoganî û hetêk ra zî îdareyê Şamî vera Rojawanî de ambargo ronayî’ û wina domna: “Seba ke darû çin o, domanî mirenî. No sucê merdimîye yo.”
Trabertî dewamê qiseykerdişê xo de wina va: “Ganî hukmatê federalî yê Almanya bikewo hereket. Bitaybetî domanî nêweşîya anemîya Deryayê Sipî ver mirenî. Na nêweşîye xirabebîyayîşê genî ver vejîyena û bi neqilkerdişê gonîye yena tedawî kerdene. Wextê tedawîye de bedenê domanan de asin kom beno û demêk ra pey o asin zirar dano domanan. Tayê darûyê ke nê asinî bedenan ra vejenî estî, labelê ê darûyî vay î û Sûrîye de çin î. Eke ambargo wedarîyo, o wext anemîya Deryayê Sipî zî nêbena.”
Ganî modele bicuyo
Trabertî dewamê qiseykerdişê xo de wina va: “Kurdî şaranê bînan reyde îdareyê demokratîke awan kerdî. Ewja de komelêko demokratîke û modern esto. Cinî û camêrdî seyyewbînan î û yê ke wazenî sereyê xo padenî. Yê ke sey rojawanijan cilan xoradanî zî estî. Ganî destek bidîyo hêzanê kurdan û hetkarîyê ke erşawîyenî ganî biresî herêma Rojawanî.”
ANF/BRUKSEL