9ê Teşrîna verêne ra nata yo ke artêşa Tirk û çeteyê ci hêrişê Vakur û Rojhelatê Sûrîye kenî. Vera hêrişê dagîrkerîye de bi taybetî Serêkanîye, Girê Spî, Kobanê, Minbic û sewbîna cayan de xoverdayîşê girdî yenî nîşandayene. Heta nika xeylê dagîrkerî ameyî kiştene, artêşa Tirkî û çeteyê ci ke nêşênî şervananê QSDyî, sivîlan qetil kenî.
Artêşa Tirkî 8 rojî yo ke bi teyara, tanq, top û çeteyanê xo hêrişê Vakur û Rojhelatê Kurdîstanî keno. Heta nika netîceyê bombardumanê teyarayan de bi desan sivîlî ameyî qetilkerdene û hendêna zî birîndar bîyî. Artêşa Tirk û çeteyê ci ke nêşênî bejahî ra aver şêrî, hewa ra bi teyara û topan sivîlan hedef gênî.
Vera artêşa Tirk û çeteyanê ci de Hêzê Sûrîyeya Demokratîke (QSD) xoverdayîşêko bênimune nîşan dano. Heta nika bitaybetî Girê Spî, Serêkanîyê û Kobanê de xoverdayîşê tarîxî ameyo nîşandayene û bi seyan leşker û çeteyê artêşa Tirkî kişîyayî.
Çarçewaya hêrişê dagîrkerîye de artêşa Tirkî û çeteyanê ci hêrişê dewanê Kobanê kerd. Şerwananê QSDyî vera dagîrkeran de xover da û derbê girdî dayî çeteyan ro. Netîceyê pirodayîşê derban de bi desan çeteyî kişîyayî. Hêzanê QSDyî artêşa Tirkî ke vera dewanê Boban û Siftekê de bica bîya hedef girewt.
Şerwanê QSDyî çalakîyanê xo domnenî
Heto bîn de Serêkanîyê de pêrodayîşî zêde bîyî. Artêşa Tirkî hewl dana bi obus û tanqan bikewo bajarî mîyan. Labelê şerwanê QSDyî xover danî. Pêrodayîşî dewam kenî. Ame musayene ke şerwananê QSDyî vera artêşa Tirk û çeteyanê ci de çalakîyêk viraşta û netîceyê çalakîye de xeylê dagîrkerî ameyî kiştene û birîndar bîyî.
Şerwananê QSDyî dewa Eyn El Arusî ya Girê Spî de wesayîtêkê çeteyan hedef girewto û netîceyê çalakîya sabotajî de 4 çeteyî kişîyayî. Reyna konvoyêkê çeteyan dewa Sukkarîyê de bî hedefê şerwananê QSDyî û xeylê çeteyî ameyî kiştene.
Minbic ra ancîyenî
Ame musayene ke leşkerê Amerîka ke Minbic de yî ver bi barajê Tişrînî ancîyenî. Reyna artêşa Tirk û çeteyanê ci dewa Um Edeset El Faratî bombe kerd û roketî eştî dewe. Bombe û roketan reyde sivîlî hedef girîyayî û netîceyê bombardumanî de 2 sivîlî merdî, 13 sivîlî zî birîndar bîyî. Birîndaran mîyan de cinî û domanî zî estî û rewşa tayê birîndaran giran a. Ame musayene ke Minbic de 45 dagîrkerî ameyî kiştene.
70 hezar domanî cayê xo ra bîyî
Dîrektora Pêroyî ya ÛNÎCEFî Henrîetta Fore bale ante hêrişanê dagîrkeran ê dewleta Tirkî yê vera Vakur û Rojhelatê Sûrîye ser. Fore daye zanayene ke rîyê operasyonê leşkerî yê dewleta Tirkî ra heta ewro 70 hezar domanî wareyê xo ra bîyî, tewr tay 4 domanî ameyî qetilkerdene û 9 domanî zî birîndar bîyî. Fore va ‘3 merkezê weşîye, wesayîtê weşîye û dibistanêk raştê hêrişan ameyî’ û wina dewam kerde: “Rîyê hêrişan ra herêma Hesekê de îstasyono ke awe dano 400 kesan, ame îmhakerdene. 170 hezar domanî hewcedarîya înan bi hetkarîye esta û ÛNÎCEF do hetkarîye bierşawo herême.”
AMED