ERDOGAN ALTAN/MA/QAMIŞLO
25ê Teşrîna peyêne Roja Piştîdayîş û Têkoşînê Mîyanneteweyî yê Vera Şîddeto ke Cinîye rê Beno yo. Babete ser o Hemsereka Kantonê Cizîrî yê Federasyonê Sûrîyeya Vakurî Hîva Ereboye qisey kerde.
Ereboye bi wesîleya 25ê Teşrîna peyêne şîddeto ke vera cinîye de beno, şermizar kerde û bi yadkerdişê cinîyê ke netîceyê şîddetî de merdî, dest bi qiseykerdişê xo kerde. Ereboye va ‘cinîyê dinya her serre 25ê Teşrîna peyêne de Patrîa, Mînerva û Marîa Mîrabale yad kenî û nê merasîmî bîyî sey kultur û mîrasêk’.
Ereboye qala têkoşînê Rojawanî kerde û wina dewam kerde: “Roja destpêke ra nata ma tim vera şîddetî de têkoşîn da. Ma Rojawan de her hetî de îradeya xo rona û ma serkewtî. Têkoşînê cinîyan yê Rojawanî bingeyê xo cografyaya Kurdistanî ra girewt, bi hezaran cinîyî vejîyayî koyan û zîndanan ra derbaz bîyî. Sakîne Cansize û embazê bînî Parîs de ameyî qetilkerdiş û herkes sey dibarebîyayîşê Wayanê Mîrabalan girewt dest. Camêrd her hetê cuye de zîhnîyetê xo dano ferzkerdiş û no tena zirar nêdano komelî, dano tebîetî zî.”
Fikrê Ocalanî ra tesîr bîyî
Ereboye dewamê qiseykerdişê xo de va ‘ma cinîyê Rojawanî fikrê Rayber Apoyî ra tesîr bîyî’ û wina domnaye: “Ma Rojawan de bi nê îdeolojîyî rêxistine bîyî. Ma cinîyê kurd, ereb, suryanî, armenî, tirkmen û sewbîna bi hezaran cinîyî têkoşîn da destpêkerdiş. Lazimîya cinîyan bi azadîye estbî. Wexto ke cinîyî sîleh girewtî û artêşe awan kerdî, hakimîya camêrdî xira kerdî. Tena Rojawan û Sûrîye de nê, dinya de vînayîşê cinîyê kurdan rê bedilîya û no het de hêvîyêk vejîyaye orte.”
Kota wedarîyaye temsîlîyeto seypê ame
Ereboye peynîya qiseykerdişê xo de wina va: “Rojawan de qezencêko bîn yê cinîyan o yo ke cinîye sere de sîyaset û waranê bînan de beşdarê cuye bîye. Êdî tena camêrd tayê babetan de qerar nêdano. Cinîye û camêrd partî, îdare û dezgeyan de bi hawayo seyyewbînan ca gênî. Labelê ma qala cenetî nêkenî. Çimkî zîhnîyetê camêrdî bi hezar serran o ke hakim o û bi temamî nêwedarîyayo. Labelê Rojawan no het de dinya rê bîyo nimûne.”