Fotografa Arash Khamooshî “Afukerdiş” Fotografa Emîn Ozmenî “Karkerê Muhacîrî yê Surîyeyijî”, Fotografa George Georgianî ‘Şer û Aştî de yew dewe”, Fotografa Kurşat Bayhanî “Keye ra Dûrî de”, Fotografê Loghman Rahimî “Hewreman”, Fotografa Serpîl Polate “Hîkayeya Caverdişî; Maden”, “Sur”, 4 Plus ‘’Erebuni ‘’Fotografa WePhotosî “Dayîke” Fotografa Firat Aygunî “Araf/Mîyanê Sûrî”, Fotografa Nujen Ataçe “Cayo ke ci de Astengî qedîyê”, Fotografa Tamer Pinarî “Ser Hivde” û Fotografa Turkan Kiliçe “Cuyê Azadî” ramojnayîşê DÎFAKî de ca girewt.
Hemserekê Şaredarîya Bajarê Girdî yê Amedî Firat Anliyî merasîmê abîyayîşê roamojnayîşî ra ver yew qiseykerdiş kerd û wina va “Tena Amed de ney, her cayê Rojhilatê Mîyanênî de pêrodayîş esto û jan yeno antiş. La çi beno wa bibo bajarê Amedî hetê kultur û hunerî ra rayîrê xo de şono. Ma demêko zor û zehmet ra vîyarenê. Ez wenasî yew dem de hunermendanê ma ra vana ke “Semedo ke şima bi fotografanê xo çîyo ke vînenê nîşanê ma dane ma şima rê sipas kenê.”
Huner semedê dîyalogî şert o
Anliyî wina dewam kerd: “Ma zanê ke semedê dîyalogî huner şert o. Werrekna sîyasetmedar, serekê beledîye, serekwezîr, serekkomar, parlementer ra zêde hunermendî qisey bikerdêne.” Anliyî qiseykerdişê xo de behsê temaya azadî kerde û wina peynîya qalanê xo ard. Azadî mîyanê cuye de ya. Azadî û cu yewbînan ra cîya nîyî. Eke şima xo azad hîs kerd şima kamca de benê bibêne şima azad ê. Hepisxane beno surgun beno ferq nêkeno. Eke şima xo azad vînenê şima azad ê. Ma hema na coğrafya de tehmê azadî nêgirewto. La ma hêvî kenê ke tewr peynî aştî û azadî yenê nê erdan ser.”
Namayê DÎFAKî ser o zî Turkan Kiliçe qisey kerd û eleqa ant karê fotografgerî ser. Aktîvîteya Rojê Fotografan Sumerparke de Galerîya Hunerî de bi panel û terreqnayîşê dewam kerd.