Endamê Konseyê Caardişî yê KCKyî Riza Altunî derheqê plan û projeyê ke bi hawayo newe Rojhelato Mîyanên de benî de qisey kerde û vînayîşê xo ard ziwan.

Endamê Konseyê Caardişî yê KCKyî Altunî qiseykerdişê xo de va qala dengeyê newe yê ke DAIŞî ra dima Rojhelato Mîyanên de bêrî awankerdiş, kerd û polîtîkaya hêzê mîyanneteweyî ya derheqê kurdan de qisey kerd.

Altunî destpêkê qiseykerdişê xo de qala bicabîyayîşê Rûsya yê herême de kerd û dîyar kerd ke Rûsya bi waştişê Sûrîye herême de bica bîya. Altunî wina va: “Nizdîbîyayîşê Rûsya yê kurdan bi hawayo dişmenî nîyo, labelê zaf bîyaye zî nîyo. Rûsya wexto ke sîyaset kena hetêk ra tirkan reyde tehdît kena, hetêk ra zî bi tersê tirkan hewl dana kurdan rejîmî ra girê bido. Seba ke kurdê Rojawanî nêyî qebul nêkenî, Rûsya sernêkewena. Rojawan de projeyêkê kurdan esto. Bi hawayo zelal dîyar nîyo ke Rûsya seba statuyê kurdan çi fikirîyena. Astana de wina kerde ke Îran, Tirkîya û muxalefeto bîn esas girewte û kurdan esas nêgirewte. Rûsya seba ke heme çîyî nêkewî destê Tirkîya, hetêk ra zî tedbîran gêna û hewl dana Tirkîya Sûrîye de sînordar bikero. Polîtîkaya xo de tim ya entegrasyonî esas gêna.”


Sûrîye de HSD, Amerîka û Rûsya mendî

Altunî va ‘Sûrîye de şerêko giran esto, labelê eynî wextî de gêrayîş zî esto’ û wina domna: “Wina bîyo ke HSD, Amerîka û Rûsya sey aktorê sîyasî mendî. Sey verên şerê polîtîk û îdeolojîk yê nê rêxistinan çin o. Hetê nê hêzan de Tirkîya û Îran zî estî. Nê hêzê girdî ya do Sûrîye de şerêko gird bikerî, yan zî do bikewî mîyanê hewldayîşê pêkerdişî. Wina aseno ke nê hêzî pênêkenî û heto bîn ra zî nê hêzî şer ra remenî. Heta nika netîceyêkê kombîyayîş û pêvînayîşê înan de nêvejîyayo. Ti manaya Astana û Cenevre nêmenda.”

 

Rojhelato Mîyanên de problemê kurd dîyarker o

Altunî bale ant rewşa kurdan ya Rojhelato Mîyanên ser û wina va: “Seke yeno zanayîş krîzo ke Tûnis, Lîbya, Misir de dest pêkerdbî, bîlasebeb Sûrîye, Îran, Iraq û Tirkîya de nêvindet. No yeno manaya ke kurd rolê esasî kurd î. Çimkî Rojhelato Mîyanên de problemê kurd dîyarker o. Tirkîya, Îran û Sûrîye nêwazenî ke problemê kurdî çareser bibo. Eke ewro kurdî kewtî rojeve, no bi destekê hêzanê hegemonîkan nê, bi têkoşîn kurdan bîyo. Xora ganî kurdî pişta xo nêdî hêzanê bînan. Eke wina bikerî o wext do kurdî bibî qurbanê hêzê herême.” 


 ANF/BEHDÎNAN