Zext û tedayê ke rojnameger û Çapemenîya Azade ser o estî, dewam kenî. Tena Tirkîya nê Îdareyê Başûrê Kurdîstanî zî vera rojnamegeranê Kurdan de bêtehemul î. Ame musayene ke muxabîrê ajansê Rojnewsî Zuber Bradost 7 rojî yo tepişte yo.
Zuber Bradost 7 rojî verê hetê Îstîxbaratê Fermandarîya Helgurdî ke girêdayeyê PDKyî yo ra ameyo tepiştene û îstîxbaratî ci berdo beldeya Mesîfî ya Hewlêrî. Reyna goreyê melumatan hêzanê asayîşî keye û merdimanê Zuber Bradostî ra vato, heta ke înan ra xebere yena wa bivinderî. Fermandarîya Helgurdî ra Behram Arifî telefon de dîyar kerdo ke o nêzano ke Zuber tepişte yo an nê.
Heto bîn ra Amed de vilakarê rojnameyê Yeni Yaşamî hetê polîsan ra ame remnayene. Ame zanayene ke vilakerdoxê rojnameyê Yenî Yaşamî Mesût Aslan gama ke semtê Gazîlerî yê Amedî de qewexane de roniştbi, hetê polîsan ra ame remnayene. Aslano ke polîsan bi wesayîtê tîpê Rangerî remnayo semedê weşîya ganê ey yeno qesewetkerdene.
AMED