Di serranê newayî (90) de, di Tirkîya de hovîtîye vecîyabî asta hewna berze. Di serre de welatê kurdan û heme Tirkîya bibî qada gunîye.
Kiştiş, terteleyê, îşkence û di bin çiman de vinîkerdiş, qewemyayişêy rojdeyînîy bîy. Di na ravêreyî de rojnamewanîy û rojnamegerîye zî bi zext û zordarîyan rîbirî bîy.
Bedêlê nuştişê raştîyan, binçimbîyiş, îşkence û kişyayiş bi.
Hember nê heme hovîtîyanê dewlete, reyna zî geleke rojnamewanan raştîyan ra fek verra nêda û seba nuştiş û aşkerakerdişê raştîyan, heme bedêlîy girewtîy xo çiman. Gelêke rojnamewanîy ke zafê înan kurdîy bîy amey qetilkerdiş. Apo Mûsa, Hafiz Akdemîr, Huseyîn Denîz, Ferhat Tepe û gelêke kesêy bînîy.
Dest bi xebatan kerd
Metin Goktepe, di 10’ê Nîsana 1968’ine de, dewa Çîpîle ya Şarçeya Gurune ya giredayeya Şaristanê Sêwaze de, daya xo ra bi. Heta 11 serreyîya xo, di dewa xo de mend. Malbata Metinî bi citêrîye debara xo kerdê. Metîn di malbate de domanê 7’ine bi. Dibistana sereta- yîye di dewa xo de wend. Di serra 1979’ine de, şi Şaristanê Stenbole. Di serra 1986’ine de dibistana Amadeyîye qedêna. Di serra 1989’ine de, di Zanengeha Stenbole beşa Îktîsadî de dest bi perwerdeyîyê berzî kerd.
Metîn di nê serran de kewt mîyanê xebatêy sîyasî û polîtîkîyan.
Di miyanê xebata wandekaranê zanengehe de bi awayêko çalak, ca girewt. Di mîyanê nê çalakîyan de, gelêke doran ame binçimkerdiş.
Nuştiş ze gureyê vîna
Metîn Goktepeyî di serra 1992 ine de, di kovara ‘Gerçek’ de dest bi rojnamegerîyê kerd. Di heme ravêreyîya weşnayişê kovare de, zey newegerî xebetya. Di 7’ê Hezîrana 1995’ine de rojnameya ‘Evrensel’ e awan bî. Metîn derbasê na rojnameye bi.
Dewletê kişt
Rayedarêy dewlete, bi vatişanê ze: “Kursîye ro kewt, dêsî ro kewt…” wazenê ney qetilî binimnê.
Labelê bi têkoşîne û rociwayir vejyayişê rojnamegeran, dewlete neçar manena ke na hovîtye qebûl bikero.
Di derbarê kiştişê Metîni de doze ame destpêkerdiş. Doza ke Stenbole de ame akerdiş bêke dest pê bikero, bi hincetê ewleyîye şirawite Şaristanê Aydin, oca ra zî Afyon.
Dim 30 roniştişan ra biryarê doze Afyon de ame dayiş.
Di 19’ê Çeleya 2000’î de 5 polêsîy amey mehkûmkerdiş. Dim ra 17 mengan ra bi efûya Rehşane polêsîy cezaye ra zî xelesyay.
Di derbarê Wezareta Karê Zerreyî de doze ame destpêkerdiş. Wezareta Karê Zerreyî, hetê dadgehe ra bi dayişê tazmînatî ame mehkûmkerdiş.
Doza Metîn Goktepeyî, yewîn doza ke kiştişê rojnamewanêke hetê dewlete ra ameyo qebûlkerdişo. Bi seyan kiştişêy bi ney rengî, hetê dewlete ra amey pêkardiş. Labelê dewlete tu dorêke ro xo mikûr nîyamî.
Tu zext û zordarî, tu gefanê dewlete rojnamegereya Çapemenîya Azade rayî ra xo ra nêaçarnay. Eke ewro raya giştîya Tirkîya tay qewemyayişêy qilêrinan ra hayîdar a, na hayîdarî bi têkoşîne û fedekarîya nê kesêy lehengan virazyaya.
Nê kesîy, ewro zî di bin heman zext û zordarîyan ney gureyî kenê, reyna yenê binçimkerdiş û girewtiş û bi seyan kesîy nika zî bi heman hincetan di zîndanan de yê. Tewr peynî dewleta tirk Kadrî Bagduyî qetil kerd.
Polêsan bi îşkence qetil kerd
Di 8’ê Çeleyê 1996’ine de Metîn Goktepe hetê polêsan ra, ke rojnamegerîye kerdê, ame kiştiş. Di Zîndanê Ûmranîye de, di (2) kesîy amebîy kiştiş. Seba merasîmê cenazeyan bişopno şibe Alibeykoy. Polêsîy nêverdenê Metin merasîmî bişopno. Seba ke Metin israr keno, ey giyenê bin çimî û nizdê hezar kesîy reyde ey benê Salona Werzîşî ya Şarçeya Eyûbe. Metin bi perodayiş û îşkence yeno qetilkerdiş.
Rojnamegerê de tersayiş çîn o
Metîn Goktepe zî nê rojnamegeran ra yew bi. Ewta ra 17 serrîy ra ver, di heştê çeleyê 1996 ine de, seba merasîmê cenazeyê di kesêy ke di zîndan de amebîy kiştiş bişopno, şibi cayê çalakîye. Metîn, nizdê hezar kesîy reyde, hetê polêsan ra ame binçimkerdiş û di binçimî de, hetê polêsan ra bi îşkence ame kiştiş.
NAVENDA XEBERAN