Heyetê mahkeme seba xopawitişî wextê jêde nîda pawitoxan, ser nayî powitoxanê Çomakî û temaşekerdoxan salona ronişten terk kerdî.
Çomak ke hetê raya pêroyîn yeno silasnayen 1994î de wexto ke Zangehê Stenbolî de wendekar bi, bi îdiayê ‘ser nameyê rêxistin çalekî viraştiş’ ame tepiştiş û netîceyê mahkemekerdişê DGM de raştê cezayê muebet ame. Bado ke Mahkemeya Heqê Merdiman yê Awrûpa qerarê ‘bi adîlane nêame mahkemekerden’ da, dosyaya Çomakî reyna ra abîya û badê 20 serran mahkemekerdiş 2013 ra tepya newe ra destpa kerd. Roniştişa dawaya Çomakî vizêr Mahkemeya Cezayê Giran yê Stenbol de amê vînayen. Parlementerê HDP, CHP, temsîlkarê partîyan, hunermend, nuştox û pawitoxanê heqê merdiman ra pîya xêlê kesan roniştiş taqîp kerd.
Pêrokîn waştenan red kerdî
Heyetê mahkeme qerar da ke Çomak ser sîstemê SEGBÎS tewrê roniştiş bibo, la Çomak tewr nêbi. Meqamê îdia hukmê verên yê derheqê Çomakî de dibare kerd. Ser nayî pawitoxanê Çomakî ra Firat Aydinkaya aşkere kerdî ke tewrnêbîyayişê roniştişî yê Çomakî înan ra xoser bîro û seba îknakerdişê ci heteyê mahkeme ra wextê jêde waştî. Aydinkaya'yî herzewbîn vistî vîrî ke hekîmê ke Çomakî mahkeme kerdî ke ameyê tepiştiş. Pawitox Aydinkaya waşt ke Çomak hetê heyetekê xoser yê darazdêran bîro mahkemekerdiş.
Pawitoxan salon terk kerd
Pawitoxê bîn yê Çomakî Huseyîn Bogatekînî zî waşt ke Çomak desinde serbest bîro veradayen û waştena wextê jêde kerd. Badê xopawitişê pawitoxan heyetê mahkeme mavên da roniştişî. Badê mavênî heyetê mahkeme pêrokîn waştenê pawitoxan red kerd. Ser nayî pawitoxan û pêrokîn temaşekerdoxan bi slogana "Bi xoverdayiş serkewnime" salona roniştişî terk kerd. Roniştiş erzîya 5ê Cotmeng.
DÎHA / STENBOL