Nê hêzî wazenê ke Rojhilato Mîyanên de no awa verdewam de bo. La dimayê Wisarê Ereban tersê hêzanê emperyalîst, hegemonîk û dîktatoran Rojhilato Mîyanên ser de virazya. Nê hêzî baş zanê ke yê etya ra tepya nêeşkenê pergala netew-dewlete bi rehetî verdewam bikerê û şaranê na herême goreyê xo ra eyar bikerê.
Helbet ê heta nuxtike peyîne zî cerebanê xo pêk anê û semedê çimeyê sererd û binerdê na herême destê înan de bimanê çi lazim bo kenê û danê kerdişî. Zey ke yeno zanayîşî hemverê dewlemendîya sererd û binerdê na herême şarê aye her tim mîyanê feqîrî de ciwîyênê. Çimik, amyeyeyê çimeyan heme şino dîktator û hêzanê hegemonîk û emperyalîstan rê.
La di rojê ma yê eyroyî de her ke şino pergalê netew-dewlete şeyeno ra û şarê na herême ver bi xoserîya xo ya şinê. Hêzê hîrilibî yê emperyalîst, hegemonîk û dîktoran hemverê nê roşnbîyayîşî ameyî tê ver û cinawirêke zey DAIŞ viraşt ke binê nameyê Îslamîyetî de dişminîye tewr pîle şaranê herême û Îslamîyetî dir keno.
Armancê viraştişê nê cinawirî fetesnayîşê serewedartişê şarê kurd û heme şaranê Rojhilato Mîyanên o. Lazim o ke nê şarî serewedartişanê xo xurt bikerê û heta serkewtiş berê. Ancî lazim o ke şarê kurd zî yewîtîya xo virazo û hemverê dagirkeran û cinawiranê înan enîya xo ya xoserî xurt bikero.
Lingêka xurtkerdişê na enîye zî viraştişê polîtîkaya ma ya perwerdehîye yo. Yeno zanayîşî ke stûne estişê netewêke ziwanê aye yo. Eke netewêke perwerdehîya bi ziwanê dayîke ra bêpar amîya verdayîşî ya netewe binê xetereyê raşayîşî de ya. Loma, lazim o ke ma bikoyê mîyanê seferberîya perwerdehîye bi ziwanê dayîk e.
Zey ke yeno dîtişî, serdema mûsinkarî û perwerdehîya newî ancî dest pê kerde. Bi destpêkerdişê na serdema mûsinkarî û perwerdehîye de ko tûtê tirkan ancî bi ziwanê xo perwerde bivînê û bi nê rayîrî xo, kulturê xo, tarîxa xo û edebîyatê xo bimûsê û tûtê kurdan zî ko ancî xo ra, ziwanê xo ra, kultirê xo ra, tarîxa xo ra û edebîyatê xo ra bêrê dûrvistişî. No asîmîlasyono bê eman ke neway serre ra zêde yo hetê hêzê desthilatdar û hegemonîkan ra bi awayêke teberê çaxî de şarê kurdî ser de yeno pêkardişî, serre bi serre tesîrê xo zêdneno.
Dimayo ke kurdî perwerdeyê bi ziwanê dayîke xo ra bêpar mendî, bê ke hay ro ci bibê roj bi roj ziwanê dayîke xo cuyînê xo ra vet, ziwanê tirkî kerd herûnde ey û bi nê awayî çerxê otoasîmîlasyonî ame destpêkerdişî. Neway serre ra zêde yo ke tûtê tirkan bi bacanê şarê kurd bi ziwanê dayîke xo perwerdehî vînenê û tûtê kurdan zî bi bacanê xo yê ke danê dewlete yenê asîmîlekerdişî. Lazim o şarê kurd na neheqîye ra vajo bes o.
Nesrîn NAVDAR