Tehemmulê dewlete çi kurd çi zî ziwanê kurdî rê qet çin o û no het de her ke şono sînorê dewlete hîna zafêr beno teng. Dewlete her çîyê kurdan rê astengî virazena. Nika zî kovara Roza ke di aşman ra yew rey vejîyena, ameye qedexekerdiş. Kovara kulturî Roza ke di aşman ra yew rey bi ziwanê kurdî û tirkî weşanîyena, bi îdîaya ‘propogandaya rêxistine’ ameye arê dayêne. 2 serrî yo ke kovare yena qedexekerdiş û vernîya vilakerdişê kovare yena girewtiş. La her çiqas ke kovare ser de zextî virazîyenî, reyna zî kovare weşanê xo domnena. Mehkemeya 3. ya Sulhî, derheqê hûmara 5, 7 û 9. ya kovare de qerarê arê dayêne da. Sebebê qerarê arê dayîşî yê hûmara 6. ‘Dosyaya Qirkerdişê Ermenîyan’ o. Hûmara 11. ya kovara Roza do heta 10 rojan bivejîyo. Îdarekarê kovara Roza ke heta nika 4 hûmarê aye ameyî qedexekerdiş, Mehmet Salîh Erşarîyî qisey kerd.
Vera kultirî yê
Eşarîyî va ‘OHALî ra ver zî kovare ser de zextî estbî’ û wina domna: “Hukmat OHALî ra dima qerarê arê dayêne da. Arêdayîşê kovare bêtehemmulîya dewlete nîşan dano. Vera kultirê kurdan de tehemmulê înan çin o. Wendox û nuştoxê ma yê ke hepisxane de yî zî estî. Wendoxanê ma ra zafaneyê înan hepsîyê sîyasî yî. Ma bi mektubanê hepsîyan ra musayî ke kovara ma nêresena hepisxaneyan. Îdarekarê hepisxaneyan kovare nêdanî zere. Her çiqas ke zextî ma ser de bibî, reyna zî bi hawayo qerardarî ma do xebatanê xo dewam bikerî.” Xebatkaranê kovare ra Şehrîban Zuhurlîye ke 25ê teşrîna peyêne de Anqara de bi çend embazanê xo reyde ameybî tepiştiş, hema zî tepişte ya.
ENQERA