Ma vat lawo niya meke, roze yena kerdena to sarê to wena. Ey vatenê "Fetullah ke mira çi wazeno dan ci, fîtne wertê ma mekerê!”

Ma vat lawo ti biya serdest halkerdena meselan peyser meerze, persê sarî meke hukumat ti ya, dima nî meseleyî torê benê saredez. Ey vatenê "Ez meselan halken, mirê dem lazimo, bi fîlî dukanê porselan mekuyê, her çî şîkîno.”
Ma vatenê, waxt rind o, hama zerrê waxtî de çiyê xiravin zî benê, ti binde manena. Ey vatenê. "Meselê seserran miyanê 2-3 serran de halnêbenê, hîssiyatê qomê mi estê.”
Ma vatenê dirvetî gune rew melem bibê, zovîna mîkrop kuno ci wes nêbene. Ey vatenê " hata 2023 û 2071.”
Ma vatenê lawo na polîs û esker teror vaydanê, gemê nînan çîp ke. Ey vatenê "Polîsê mi û eskerê mi karê xo kenê” û haletî dênê ci.
Polîs, esker, valî û burokratê bînîyê ke bêçika xo kistena Hrant Dînk de biyê, pêro terfî kerdî. Recep Tayyîp Erdogan, Muammer Guler verecoy kerd parlamenter, dima kerd wezîr. Recep Tayyîp Erdogan wast bi yardimê nî mordemanê tariyan hukmê xo quwetin kero.
Rayverê qomê Abdullah Ocalan çond reye hukumatê AKP hesna pê û vat: "Kamî ke hata ewro mesela kurdî halnêkerde, peyniye de ebi xo halbî.” La, Recep Tayyîp Erdogan gosro ci nêna.
Fetullah Gulen seweta kurdan fermanê merdîsî dênê, hukumatê AKP vengê xo nêvetenê. Fetullah Gulern seweta dersîmizan fermanê merdîs dênê, Recep Tayyîp Erdogan ra pize nêvejiyenê.
Polîs û eskerê Recep Tayyîp Erdogan domonê kurdî kiştî, bi hezaran siyasetvanê kurdî estî hepisxanan, hukumatê AKP bêveng mend.
Nika Fetullah Gulen verva Recep Tayyîp Erdogan û AKP operasyonode henen virast, ke verê çimanê xo bî tarî.
Vajîno ke na herbê mavênê cematê Fetullah Gulen û AKP de teqetê mavênê netavan zî estê. Raştiye de Fetullah Gulen bîlasevev Amerîka de nêvindeno. Erdogan û AKP no saredez ebi xo kerd pêda. Her wastîsê Fetullah Gulen ard ca, demokrasiye teyna seweta xo û cematê Fetullahî arde kar. Nika na herb hurdemîne rê xêr bo.
Kurdî gune nî rozanê niyanenan de dîqet bikerê û na herb ra dûrî vinderê. Çike hem cematê Fetullahî, hem zî AKP dirvetin yê. Beno ke polîs û eskerê Erdogan û Fetullahî provakasyonan virazê.