Qetilbîyayîşê zanayê Kurdan Apê Mûsa ser ro 27 serrî derbas bîyî. Herçiqas ke qatilê ci ameyêne zanayene zî heta nika ti netîce nêameyo girewtene. Verfekê Înîsîyatîfê Rojnamegeranê Azadan Hakki Boltanî wina va: “Vatişê Apê Mûsayî yê ‘Êdî bes o’ hîna zî zimeno. O veng bi berz û ewro vilayê heme cayan bîyo.”

ARJÎN DÎLEK ONCEL / MA / AMED

Rojnameger û nuştox Apê Mûsa (Mûsa Anter) seba ke beşdarê Festîvala Kultur û Hunerî bibo şibi Amed û 20ê Êlula 1992î de hetê endamanê JÎTEMî ra semtê Seyrantepe de amebi qetilkerdene. Ewro serrgêra 27. ya qetilbîyayîşê Apê Mûsayî yo. Herçiqas ke qatilê ci ameyêne zanayene zî heta ewro ti kes nêame tewqîfbîyayene û doze de ti netîce nêameyo girewtene.

Apê Mûsa ke cuya ey bi zîndan û surgunan derbas bîye, 1920 de dewa Ziwinge ya Nisêbîna ya Mêrdînî de ame dinya û Stenbol de perwerdeyê huqûqî dî. Apê Mûsa rojnameyanê Şark Postasi û Dîcle Kaynagi de dest bi nuştişî kerd û şîîra xo ya ‘Qimil’ ver ame tewqîfbîyayene û cezaya îdamî ra ame mehkemekerdene. Apê Mûsa zîndan ra dima kovaranê Deng, Bariş Dunyasi û Yonî de nuşt. Apê Mûsa dima ra Dîcle-Firat, Azadîya Welat, Yenî Ulke, Ozgur Gundem, Rewşen û Tewlo de zî nuşteyî nuştî.

Zanayê Kurdan Apê Mûsa 20ê Êlule de ame qetilkerdene û hedîse ra dima tehqîqat dîya destpêkerdene. Heta nika tehqîqat de ti averşîyayîş nêbîyo. Tetîkkêşê JÎTEMî 2004 de tayê çîyî îtîraf kerdî û dîyar kerdbî ke cînayetê Apê Mûsayî hetê JÎTEMî ra ameyo plankerdene û kesê sey Ahmet Cem Ersever, Mahmût Yildirim, Mûstafa Denîz, Savaş Gevrekçî, Alî Ozansoy, Cemîl Işik û Hamît Yildirim berpirsîyar î. Keyeyê Anterî doze kirişte Mehkemeya Heqê Merdiman yê Ewropa (MHME) û MHME doze de Tirkîya mehkûm kerd. Hamît Yildirim 2012 de Şirnex de tepişîya û doza Apê Mûsayî doza JÎTEMî reyde pêdûsyayî.

Qelema Apê Mûsayî erd de nêmende

Hemserekê Kurt Penî Samî Tanî va ‘badê ke Mûsa Anter ame qetilkerdene, mi rojnameyê Welatî de dest bi nuştişî kerd’ û wina dewam kerd: “Mergê Apê Mûsayî ra dima kuncê ci yê rojnameyî de hertim nuştoxê Kurdî nuştî. Keda Apê Mûsayî ya Enstîtuyê Kurdî yê Stenbolî zî heta ewro dewam kena. Qelema Apê Mûsayî erd de nêmende. Qelema Apê Mûsayî heta ewro nuştişê xo domnena û ewro xebatê ey resaya bi mîlyonan kesan. Eke ewro bi mîlyonan kesî rasteyanê Newroze de yenî têhet, no xo bi xo nêbîyo. Wextê Apê Mûsayan de o toxim ame eştene.”

Vatişê ‘Êdî bes o’ hîna zî zimeno

Verfekê Înîsîyatîfê Rojnamegeranê Azadan Hakki Boltanî zî va ‘Apê Mûsayî donemêko tarî de xebetîya’ û wina dewam kerd: “Labelê Apê Mûsa qet vatişê xo kêmî nêkerd û hertim vengê xo kerd berz. Vatişê Apê Mûsayî yê ‘Êdî bes o’ hîna zî goşanê ma de zimeno. O veng bi berz û ewro vilayê heme cayan bîyo. Dişmenî va qey eke Apê Mûsayî qetil bikero do çin bibo. Labelê Apê Mûsa hîna zî bi gird. Her ke Apê Mûsa bi gird, qatilî bîyî şenik û mecbûr mendî ke xo biniminî. Herkes zano ke hîna zaf lazimî bi Apê Mûsayî esta û goreyê ci nizdî beno.”