ÎKK, 2001 de amê ronayene, hetanî nika derheqê Kirmanckî de xêlê gureyînê zey konferensî, panelî, kursê zonî, tîyatro, şandê kulturî viraştî. Lê karê ÎKKyo tewr balkêş, projekta “Materîyalê musayişî yo dizonkî” ya. ÎKK serva ravey berdişê Kirmanckî û musnayişê ci ser projeyanê ciya ciya de xebêtyena.
Armancê şahî çik o
Serekê Înstîtutî Lerzan Jandîl’î, derheqê Şahîya Kulturê Kirmancan de aşkere kerd ke, hedef û armancê Înstîtutê Ziwan û Kulturê Kirmancî o wo, ke kirmancê ke Berlîn de cuwyenê, bi wesîle na şahî bêrê têlewe, hem goş ra muzîkê kirmanckî ser nê û hem kî zon û kulturê xo rê wayîr bivecîyê. Heto bîn ra kî endam û îdarekerdoxê Înstîtutî wazenê, ke Înstîtutê Ziwan û Kulturê Kirmancî, qomî mîyan de hîna rind bêro naskerdene û kirmancî wa bizanê ke ju dezgeyêde mano nîyanên est o û xizmeta ziwan û kulturî de ro.
Poncê Adare de
Îdarekerdoxanê Înstîtutî û endaman, awankerdîşê Înstîtutî ra na het, yane hêyanî nika xêle şahîyê kulturî, oncîya rewşa ziwanê kirmanckî ser o panelî, konferansî, semînerî, hama-hama her serre oncîya Şewa Yadkerdîşê Sêy Rizayî, Şahîya Gaxanî, kombîyayîşî û şewê kulturî viraştî û hona kî nê şewê kulturî ênê organîzekerdene. Oncîya kar û xizmetê Înstîtutî ziwan û kulturê kirmancan ser o dewam keno. Na şahîye de hunermendo hêja Zelemele kî bi muzik û lawikanê xo şahî de ca gêno û reng dano şahî.
Programê Şahî poncê Adare, roja sêşemeyî, saate 19:00 de, yehata Werkstatt der Kulturen (Wissmannstr. 32, Berlin) de dest pêkeno.
WUSENE GESTEMERDE/BERLÎN