Hîrê boranê haştiye. Sakîne Cansiz, Fîdan Dogan û Leyla Şaylemez. Jû serre bê sima vêrde ra şiye. Hona tewa araze nêbiyo. Qetilkarê sima hona nêvejiyê werte, ya zî kes nêwazeno werte vejiyê. Merdena sima tabî merdena însanêde normalî niya. Sima girsî bî. Dismenê sima zaf bî û girsî bî. Jû dewlete nêbiye qetilkara sima. Hen oseno ke bêçika xêle dugel û dewletan esta kistena sima de. Na semed ra kistoxê sima hen rehet araze nêbenê. Seke hata ewro kistoxê Olof Palme araze nêbiyê.

Tam serra 2013 dest kerdenê ci ke, Lîce ra qetilkerdena 10 hevalanê sima amê. Sima qetlîamê 10 hevalanê xo hesna, cirê heştîrî kerdî war. Dima vajiya ke seweta haştiye qeseykerdîşî benê. Belka sima zî vatenê “eke henî yo, naye ra tepiya merdîs nêbeno” û bî sa.
Ma ke hesna haştiye sero qesey beno, bîme sa jê sima. 9ê asma gucige vêsaye Parîs de qetil kerdena sima aqilê keşî nêamenê. “Haştiye biyenê.” La omidê ma şîkiya, zerya ma vêsê, dîna ma biye tarî. Hîrê boranê haştiye ameyî bî qetil kerdene. Hîrê çilê Kurdîstanî ameyî bî wesaynayene. Hîrê tomorê ma ameyî bî birnayene. Gonya ma herrîkiyenê, kolananê Parîs de.
Waxtoke xebera şaye biye vila, dîna kurdan herrikiye Parîs. Pêro dugelan ra domonî, gencî, kokimî, cenî û camerdî seweta sima Parîs de ameyî pêser. Însanêke zovîna raya sima ra nêşiyenê, a roze ameyî bî Parîs û simarê heştîrî kerdenê war bi samîmiyet. A roze teqetê dewleta Fransa kolananê Parîs de nêosayî. Polîs û eskerê Fransa werte ra bîbî vîndî, seke demê qetil kerdena sima de bîbî vîndî. Kolanê Parîsî binê bandira kurdan de bî.
Heya, mavên ra 12 asmî vêrdî ra şî. Dewleta Fransa ya ke çeyanê kurdan bîle bi kamera taqîb kena, zerrê Parîs de saziya kurdan de kistena hîrê borananê haştiye de tewa nêdî. Na zî osnena ke şîrîkê na qetlîamî zaf yê. Qetlîam hata nika nêamo roşt kerdene. Manê naye zî na wo: Na qetlîam de xêle teqetan ca gureto.
Tetîkkeş belka qickek û erzan o, hama patronê xo hîra, girs û dewlemendi yê. Qetlîamê niyanen zî nînê roşt kerdene. çike ebi piya gurenayîsê dewletan benê. Seke nêvat, hata ewro qetilkarê serokwezîrê Îsveç, Olof Palme zî werte de çînê. Zerrê na jû serre de tayê çiyê balkeş zî bî. “Dizdî” kewtî çê savciyê dawa, kompûterê savci “tirt”!
La kurdî zerrê na jû serre de bêveng nêmendî. Her hefte roza çarsemiye însanê kurdî, bi taybetiye ceniyê, kurdî verê konsolos û saziyanê Fransa de yenê pêser û roşt kerdena qetlîamê Parîs wazenê. Kurdî Sakîne, Fîdan û Leyla xo, xo vîra nêkenê. Kurdî 11ê na asme onca herrîkînê Parîs.