Komxebat de do polîtîkayê şer û rewşa Rojhîlatê Mîyanê ser nîqaş bêro kerdiş û do komxebatê ra zaf hûmarîy de pispor, cigêrayox û akademîsyen beşdar bibî.
Heqê komxebat de endama Rayverîya SAMERê Yuksel Genç agahî da. Genç vat ke peynîya Terteleyê Pirsûs û averşîyîşê bîn de Tirkîya de konsepta şerî dest pê kerd û ê zî wazenê kokê nê averşîyîşan ser waş cigêrayiş bikerî û no ser zî do na komxebatê bivirazî.
Genç aşkera kerd taybetê nê hîrê hewtayeka vaya şerî Tirkîyayê varişta û despêka na vaya şerî zî Terteleyê Pirsûs a û wina vat: “Pirsûs de peynîya terteleyê Tirkîya verba şarê kurd dest pê şerî kerd. Tirkîya tena bi formalîteyê çend bombeyê ser DAIŞ eşt la esil hêriş nika ser kurdan de meşnena.”
Yuksel destnîşan kerd ke komxebat de sifteyin polîtîkayê Tirkîyayê yê teberî, ser Rojhîlatê Mîyanînê stratejîya AKP û DAIŞê nîqaş bêrê kerdiş, taybetê warê îslama radîkal de cigêrayox û pisporeke xebat kenî ê beşdarê komxebat bibî û qise bikerî.
JINHA/AMED