AKP weçînayinanê 1’ê Mijdarî de zî xîle, tiriten, kay û komployan de israr kerd. Weçînayinanê 7’ê Hezîran’î de derbeyê da gird girot û tenya nêbî îxtidar û amê sînorê letebiyîn. Badê na binkewtişa gird sermiyanê AKP are bî û jû stratejiyê da newî aşkere kerdî. Goreyê na stratejî pêvacoyê çarekerdin hewadiya, fina-reyna startê herb ame dayen, her roj bi desan cenazey amey, lez day operasyonê qirkerdinê siyasî. Na çarçove de kiştişê kesê sivîl roj bi roj dewam kerdî. Zey mesûlê no tabloyî PKK û HDP sucdar kerdî. Winî kerdî ke Partiya Demokratîk yê Şaran krîmînalîze û terorîze kerdî. Xo ra artêşa tirk zî demê weçînayinan de serva AKP gurweya. Çapemeniya hetkar yê îxtidar de herb û merdişan ra HDP mesûl girotî. Binî ra zî propagandayê reş yê zey “welat dest ra şino, welat kewno destê kafiran, Kurdî, Ermenî, Alewî yenê ser îxtidar” ramitî. Rixmê na stratejiya gonîn û talokeyî AKP dî ke tenya bi sere xo nêbena îxtidar. Nayî ra onca destpa xîle û tiritinan kerd. Netîceyê weçînayinan na raştî rafînenê ver çiman.
Weçînayinê 1’ê Mijdarî yê ke bin ablûqeya eskerî de viraziyay de 48 019 985 weçîntoxî şî ser sandiq. AKP ya ke 7’ê Hezîran’î de reyanê 18 867 411 kesan girot, 1’ê Mijdarî de reyanê 23 669 933 weçîntoxan girot. Goreyê nê netîceyan reyê AKP mavêna çihar (4) mengan de nezdiyê panc mîlyon biyê vêşî.
Nika tiya de gune ma na pers bikerê; AKP mavêna çihar aşman de sekerd ke reyê ci bî vêşî? Raşto çeteyanê AKP Kurdistan de fina qeçek-domanan, pitikan kişt. Kiştişê ceniyan rê çimê xo girot. Îtifaqê ci bi DAİŞ ra dewam kerd. Bombeyanê ganî yê DAİŞ berd mitînganê azadîwaştan de teqîna. Nîjadperweranê tirk kirêşt kuçeyan û rişt buroyanê HDP û esnafanê Kurd ser. Muxalîfanê çepger, roşnbîr, nuştox, sosyalîst û demokratan tehdît kerd û cezayanê giran vurna ser înan. Girotxaneyan de binlingkerdinê heqî bî vêşî. No lîste wina-niya beno derg û şino. AKP zewbîn sekerd kam şeno se vajo? Qey AKP mijdaniya rojanê roşnî û rindekî da mi nêaşnawit? Qey AKP kampanyaya weçînayinan de behsa jû jûyî nêkerd û sozê birabiyena şaran da? Qey erdoğan’î va, endî wextê jû mîlet, jû dewlet, jû al, jû îtiqat qediya û va endî pêrokîn şarî êşkenê bi ziwandê may perwerde bivînê? Qey wina ame vaten? Mi vatişê winayî qet nêaşnawit. Mi tenya aşnawit ke, AKP va; “ma dê herb xorîn û gird bikerê”. Na çarçove de xeylê çiyê bînî zî vatî. Yanî AKP serva ke tenya bibo îxtidar her çî kerd. Badê no tabloyî de serreyê mi de jû persê da gird abiya. Rixmê nê vatiş û polîtîkayê şaş, senî beno ke reyê AKP hendayî berz bî. Û mezgê mi de tenya jew cewab vejyeno.
AKP weçînayinan de xîle û kayê zaf gird ramit. Tewr cor de dane da vurnayiş. Veriya 7’ê Hezîran’î de vejya teber ke AKP serva mudaxalekerdinê daneyan hîrê hezar û pancsey kesan ra jew ekîb ronayo. No ekîp 1’ê Mijdarî de zî ser kar de bi. Roja 1’ê Mijdar’î de zî her ca ra belgeyê xîleyan vîniyay. Xeylê cayan de reyê ke sandiq ra vejyay homarê weçîntoxan ra vêşî bî. Xo ra HDP xeylê cayan de îtirazê xo kerd.
Cok ra kes nêşeno vajo ke weçînayinî hewayê do demokratîk de viraziyay. Û kes nêşeno pê îkna bikero ke netîceyê weçînayinan meşrû û helal ê. Tayn çorbeyê liberal nika werzenê HDP zey gunahkar û sucdar damisnenê. Helbet heqê rexne yê herkesî esto. La çiyê ke mavêna çihar aşman de amey ciwyayiş veriya çimandê herkesî bî. AKP ya ke artêş girot pey xo, bi pêrokîn quweta xo hêrişê HDP û weçîntoxanê ci kerd. Nayî ra nê kesê ke HDP ya zî PKK sucdar kenê û AKP pak vejenê bi tersa AKP ya wijdanê xo kerdê vinî ya zî aqilê xo. AKP bade 7’ê Hezîran çima qerarê weçînayinanê rewî da? Serva ke tenya bibo îxtidar nêda? 7’ê Hezîran de vejya teber ke bi rayanê demokratîk, bi destê weçîntoxan nêbena îxtidar. Tenya jû ray mend a zî xîle û tiritenan. Helbet gerek HDP zî tabloyê pêroyîn û netîceyanê weçînayinan ser de vindero, ray û raybazanê xo vêşî bikero, keye bi keye bigeyro û xo bido silasnayiş. Na babedê da bîn a. La gune kes ser netîceyanê weçînayiyan ser ra nay nêkero. Werte de jew sucdarê weçînayinan esto se, o zî Erdogan û AKP yo.
Netîceyê weçînayinan îşaretê jû raştiya bîn zî kenê. Gune pêrokîn çormeyê azadîwaşt quwetê xo bikerê jew û pêro piya vengê do berz vejerê. Zewbîn tercîxê do bîn nêmend. Verniya derbeya dîktatorê derg encex bi xoverdayişê do piyayî yena giroten. Tekoşîn tenya wextê weçînayinan de nîna dayen. Ya esasî kuçeyan de yena dayen. Nayî ra netîceyê weçînayinan mesajê serhewadayişê da gird danê.