Rojek heş, verg û luye yenî têhet xo ra qisê kenî û vanî ma şi sêd biker.

Pêro wirzenê û şinê sêd.
Heş yew vîtik yanî xezal, verg yew arwêş yanî hergoş, luye zî yew zeranc sêd kena.
Hîrê heme zî bi şad û keyf agerenê yenî warê xo û boye xo danê.
Wextê werdiş yeno, heş  vergî ra vano, vergo bira hadî ma ra sêdê  bar biker.
Verg wirzeno vano,”Wa vîtik yanî xezal mîrê koyan û daristanan heş ra bo.
Wa arwêş zî mi ra bo.
Wa zeranc zî waye mi luye re bo”.
Wexto ke verg hina sêd bar keno, çime heş benî sur û vano, “No çi edaleta, ti seyî hina bar kenê!
Ez eza, eza ke mîrê koyan û daristana, ti  seyî têna vîtik danê mi”.
Lap û penc xo keno berz û dano vergî ra, vergî erd ra keno derg û kişeno.
Dima ra vano, “Hadî waye lu ti ma ra sêd bar bikerê”.
Luye vana, “Mîrê koyan û daristanan biraye mi heş wa, zeranc seba arayê tu bo, arwêş seba werdişê tu nîmroj bo û vîtik zî seba şame  tu yê şand bo. Çi aste ver to bimane wa eyê zî bare mi bê”.
Heş vano, “Waye luye ti çi bi edaletê. Vergî zî hina bikerdenê  mi erd ra derg nêkerdenê û nekiştenê”.
Edaleta dewleta Tirk û AKP zî zê şanika heş, luye û vergî ya. Zê adeleta heşî ya.
Kirdan, seba Tirkan şer kerd, gonî da, can da, wayîrê înan vejîyê.
La wexto ke Komare Tirk 1923 de ame awakerdiş, qerarê Tirkan ayê ewwîlî o bi ke, bîyayîşê Kirdan înkar kerd.
Bûyera Şêx Seîd de ser Kirdan qirkerdiş kerd. Agirî de, Sason de, Motkî de, Dêrsîm de, Oramar de qirkerdiş kerd.
Dewleta Tirk wa “Mîllete Kird çîno.Pêro Tirkî”. Hetê kulturî de Kird qirkerd.
Caye edalet de bêedaletî û zulm kerd.
Dewleta Tirk, xo ra verêcu şarê Armenî, Suryanî û Rom qirkerdibî.
Nika zî yew belge newe vejîya werti. Ser na belge di nuştoxê Yenî Ozgur Polîtîka Selahattîn Erdem û Huseyîn Alî nuşte xo de ma haydar kerdê. Gore nuşte înan na belgeye AKP û MÎT’a.
Na belge de ameya nuştiş ke, “Gera pêronê şarê Kurd bîyero qirkerdiş. Hetê kulturî û sîyasî de zî bibo Tirk.
Seba nayê gera zerrê Kurdîstanê de komalê girêdayî Rêxistina Fetullah Gulen, Hîzbul-Kontra, Menzîlcîyan, Suleymancîyan bîyerenê destek kerdiş û seba qirkerdişê Kirdan bîyerenê şixulnayîş”.
Belge de ameyo nuştiş ke, awakerdişê Komare Tirk de Kird seyî ameyê qirkerdiş gera nika zî eynî plan dewam bikero.
Edaleta AKP,eynî zê edaletê heş a.
Kirdan û Tirkan pîya şer kerd. La dewleta Tirk û AKP se kerd?
Verêcu Armanî, Suryanî û Rom qirkerd. Dima ra ser Kirdan qirkerdiş da destpêkerdiş.
Belge AKP û MÎT de vejîyo werti ke, AKP zê Kemalîstê Kewe no qerkerdiş ramnena û dewamkena.
Şarê Kird  gera na raştîyê AKP weş bizano. Hemverê zulm û qirkerdişê AKP xoveradayîş bikero.