FÎDAN ABDULLAH ANHA/ŞEHBA Wexto ke Şorişê Rojawanî dest pêkerd, efrînijî seba ke bi ruhêko ortax hereket bikerî, dest bi rêxistinkerdişê sîstemê komunî kerdî. No rêxistinbîyayîş xoverdayîşo ke vera abluqa û hêrişê artêşa tirk û çeteyanê ci de ame dayene de rolêko muhîm kay kerd. Efrînijê ke mecbûr mendî ke erdanê xo biteriknî û Şehba de bica bibî, sîstemê xo yê komunî newe ra awan kerdî û heta nika 35 komunî ronayî. Efrînijan goreyê lazimîya herême komunê xo awan kerdî, îdarekarê xo weçînayî û çarçewaya komunan de komîteyê xizmet, sulh, zîyaret, nufûs, perwerde, cinî û pawitişî awan kerdî. Her komîte de 3 endamî ca gênî. Komîteya Xizmetî seba ke lazimîya awe û cereyanî ya şarî pê bîyaro, xebetîyeno. Reyna komîteye heta nika seba problemê kanalîzasyonî çareserî dîye. Komîteya Sulhî zî seba çareserîya problemê welatîyan xebetîyena. Komîteya Zîyaretî her roje efrînijê ke Şehba de yî zîyaret kena û moral dîyeno şarî. Endamanê komunî ra Ehdas Xedîce Îboyî dîyar kerd ke şarê Efrînî 7 serrî yo ke bi komunan rêxistine beno. Endamê Komîteya Zîyaretî ra Cuma Welîyî zî va ‘sîstemê komunî seba efrînijan zaf muhîm o’ û wina domna: “Bi tarzê xebata komunî ma eşkenî Sûrîye de yewîye awan bikerî.”