Esnafê ke dewanê qezaya Mutî ya Mêrsînî ra zeytûnan herînenî û anî merkezê bajarî de roşenî, krîzê ekonomîke ver gerre kenî.
Babete ser o esnafî qisey kerdî. Esnafan ra Erol Bayrako ke meslekê pîyê xo domneno, wina va: “Ez 5 serrî yo ke şona bazarê zeytûnan û yena. Zeytûno tewr baş yê Mutî yo. Tayê zeytûnî mîyanê demî de helîyenî û şonî. Ma zeytûnanê Mutî tîya de roşenî. Her serre vaya zeytûnan hetê fabrîkayan ra yena dîyarkerdiş. Ma kîloyê zeytûnan bi 5 an 6 TLyî ra gênî û ancax 50 kuruş yan zî 1 TL tira qezenç kenî. Par karê ma baş bî; yê ke par 40-50 kîlo zeytûn herînayêne, emser ancax şêno 10 kîlo biherîno.”
Esnaf Alî Uçarî zî va ’30 serrî yo ke ez bi destê dewa Mutî ra zeytûnan ana û roşena ‘ û wina domna: “Ma bi serran o rotişê zeytûnan de probleman cuyenî. Bitaybetî emser krîzê ekonomîke ver, ma zaf zehmetî ancenî. Merdimî nêşênî zeytûnan biherînî. 30 serrî yo eynî yo. Ma nêşênî sewbîna çî bikerî. Eke ez nêşênba biroşa, ez do nê karî verada.”
Marketê girdî ma danî zorî
Esnaf Necatî Parlakî zî wina va: “Ma nêşênî marketanê girdan reyde bikewî reqabetî mîyan û wina dewam kerd: “Seba ke marketan de kartê kredîye esto, zeytûnî roşîyenî. Helbûk marketan de kîloyê zeytûnan 40 TL yo, labelê tîya de 7 TL yo.”
MA/MÊRSÎN