Endamê Fermandarîya Qerargehê Merkezî yê HPGyî Bahoz Erdalî şero ke Kurdîstan de beno ser qisey kerd. Erdalî dîyar kerd ke dişmenî kurdan ser o koletîye da ferzkerdene û wina va: “Şarê ma bêalternatîf nîyo û wa şarê ma mezgê xo ra zîhnîyetê tirkan bierzo. Wa ciwanî vera xo bidî koyan.”

DÎCLE FERAT / ANF / BEHDÎNAN

Endamê Fermandarîya Qerargahê Merkezî yê HPGyî Bahoz Erdalî şerê dewleta tirkî yê Kurdîstanî ser o qisey kerd û malumatê muhîmî pare kerdî.

Endamê Fermandarîya Qerargahê Merkezî yê HPGyî Erdalî bale ante xoverdayîşê gerîlayê Kurdîstanî ser û wina va: “Semedê gerîlayî şer çîyeko newe nîyo. 35 serrî yo gerîla hemverê dewleta tirkî de şer keno. Cok ra gerîla dewleta tirkî hol şinasneno. Gerîlayê Kurdîstanî wayîrê tecrubeyêkê girdî yo û serkewtişê girdî vîstî dest.”

Erdalî dewamê qiseykerdişê xo de wina va: “Şerê mabênê gerîla û dewleta tirkî heta serra 2014î  bikontrol bi. La 2015î ra dima rayberîya Erdoganî de dewleta tirkî dest kerd şerê topyekunî. Dewleta tirkî nêverdena şarê kurdî û muxalîfî nefes bigêrî. Na heqîqetêk a. Naye tena ma nêvanî.  Ewro bi seyan rojnameger, roşnvîr û merdimê demokratî Tirkîya ra remayî. La ma naye vajî; raştî de ewro dewleta tirkî heme hêzê xo vera gerîlayî de şuxulnena.”

Erdalî bale ant hesabê Erdoganî ser û wina va: “Hesabekê Erdoganî o bi ke Vakur de gerîla tasfîye bikero û dima ra zî bi paştîdayîşê sîyasetmedarn Şorişê Rojawanî bifetisno. Erdoganî waştêne ke wina xo qezenckerde ramojno û Rojhelato Mîyanên de rolêk bigêro û çîyekê hîna zafî biwazo. La şarê ma rixmê heme hêrişan destûrê naye nêda. Şarê Kurdî va ke ‘Ti eşkenî ma bierzî zindanan, dewe û bajaranê ma biveşnî la ti qet nêeşkenî îradeya ma teslîm bîgêrî’. Heto bîn ra zî xoverdayîşê gerîlayan heme planê lêşinî yê dewleta tirkî pûç vetî. Nê semedî ra Erdogan hemverê şarê kurdî de wina bîyo hêrişkar.”

Erdogan her roje peyser game erzeno

Erdalî qiseykerdişê xo de qala krîzê ekonomîke kerd û wina va: “Rîyê şerê Erdoganî ra ewro krîzo ekonomîk esto. Her roje bi desan teyarayî werzenî. Weriştişê teyarayêkî de se hezaran dolarî şinî. Masrafo pîl şerî rê yeno kerdene. Reyna rîyê şerî ra Kurdîstan de zî haywankarîye qedîyaya. Xora citkarî û tîcaret de çîyêk nêmend. Ekonomîya Tirkîya xeyrê berardişê Kurdîstanî payra bî. La nika nê zî nêmendî. Cok ra sebebê îflasê ekonomîye vînîkerdişê AKPyî yê şerî yo. Erdogan derheqê polîtîkaya Sûrîye de zî her roje peyser game erzeno û teslîmê Rûsya beno ke no tewr peynî de meseleyê Îdlîbî de zî ame vînayene. Xora Iraq de zî sey verî rolê înan nêmendo. Sebebê nê hemeyan şerê gerîlayî de vînîkerdişê înan o. Bêşik o ke şero ke Kurdîstan de yeno kerdene şerêko normal û rehet nîyo.”

Rayber Apo mewzîya tewr zore de şer keno

Erdalî bale ant têkoşînê Rayberê Şarê Kurdî Abdullah Ocalanî ser û wina va: “Xora hêrişê tewr girdî Raber Apoyî ser o benî. Na mehne de mewzîya tewr zore de Rayberê ma xover dano. Gerîla de tifing esto û koyanê Kurdîstanî de azad o. Gerîla bi şarê xo ya yeno têhet û vera dişmenî de şer keno. La Rayber Apo tena vera terorê dewlete de têkoşîno tarîxî dano. Nê vindetişê erjayeyî yê Rayber Apoyî ver tecrîdî xorî kenî. La ê se kenê wa bikerî gerîla û şarê ma xeta Rayberê xo de têkoşînê xo xurt kenî.”

Erdalî peynîya qiseykerdişê xo de wina va: “Qet yew wextê tarîxî de şerî rehet nêbîyî. Heme şerî zehmet î. Çi heyf o ke şer de merg esto. Dişmenî nê şerî rê ma mecbûr verdayî. Dişmenî va ‘şima yan benî koleyê mi yan zî mirenî’ rayîro hîrêyin çin o. Ma zî dişmenî ra naye vanî. Ma ne koletîye qebul kenî ne zî ma sey verî bêhêz ê. Ti eşkenî ma ra tayan bikişî. La ti do bedelê naye giran bidî. Ewro hêzê şarê ma esto. Xora adresê ciwanan aşkere yo. Wa heme kurdî hol bizano ke dewleta tirkî dişmen a û wazena ke kurdan biqedêno. Şarê ma bêalternatîf nîyo. Ganî kurdî ruh û mezgê xo de zihnîyetê tirkan bierzê û bi hawayo azade bicuyî. Wa ciwanê ke raştê hêrişê fizîkî û kulturî yenî, vera koletîye de milê xo çewt mekerî. Ewro ê mezelê kurdan zî qebul nêkenî. Vera naye de ti senî vindenê? Çimanê xo abikere, çok mede verê xo bide koyanê azadîye.”