Peynîya weçînayîşê 7’ê Hezîrane AKP û Erdogan dest pê polîtîkayê provokasyonî kerdî. Sifteyin projeya Rayverê Şarê Kurd Abdullah Ocalanî, ‘Ravêreyeya Çareserî’ têk berdî. Sifteyin Pirsûs û peynî zî Enqereye de ciwanê sosyalîst, elewî, kurd û bindestan qetil kerdî. Nika 1’ê Teşrîne de weçînayişek esto, no weçînayîş de verê AKP û Erdoganî de tena HDP vindena. Hemserekê Konseya Rayverî ya KCKe Cemîl Bayik veng da şarê Dêrsim, Çewlîg, Mûş, Erzirom û Xarpetî.
Faşîstîya AKP
Hemserekê Konseya Rayverî ya KCKe Cemîl Bayik verê qiseya xo silam û hurmetê xo şarê Dêrsim, Çewlîg, Erzirom û Xarpêtî kerd û vat ke o bawer o ke şarê nê heremî, weçînayîşê 7’ê Hezîrane ra hîna xurtêr beşdarê weçînayîşê 1’ê Teşrîne bibî, 7’ê Hezîrane de şarê nê heremî bi raştî xebateko gird meşnayî û netîceyê muhîm dest vistî, labelê dewleta tirk a faşîst, Erdogan û AKPe, MHP reyde na netîceye hezm nêkerdî, no ser zî şanê 7’ê Hezîrane de mudaxele kerdî.
Bayik wina vat: “Peynîya weçînayîşê 7’ê Hezîrane bi aşkera nê dorûverê darbe viraştî, wekîlê HDPe, netîceya weçînayîşî û îradeya nêşinasnayî. Fina ke zey no weçînayîş nêameyo cuyayiş. AKPe îqtîdarî ra kewt û xeyalê Erdoganî têk şîyî. Şarê kurd û HDPe ra heyfgirewtişî rê dest pê konseptê şerî kerdî. Ser şarê ma şer ferz kerdî. Taybetê şarê ma yê nê heremî 7’ê hezîrane de dîroka xo ra gam eştbî, no gam zî muhîm o. Ganî şarê nê heremî weçînayîşê 1’ê Teşrîne de zî bidomnî û beşdarbîyîşê xo hîna zafêr bikerî.”
Şarê Mûş qehreman o
Bayik qehremanîya şarê Mûşî ser vat ke na ravêreyeye de gimgimijî bi qehremanî ver xo day, dijmin waşt Gimgimî teslîm bigêro, ya zî şarê ci bido koçkerdiş, la gimgimijî nê elewî ci nê zî sunnî ci teslîm nêbî û koç nêkerdî. Bayik aşkera kerd ke dijî mêtingerîya dewleta tirk a faşîst û polîtîkayê ci yê hovane, bi gird xo ver da, Kurdistan de xoverdayîşî ra rayverî kerd, no ser zî o gimgimijan, hem elewî û hem zî sunnîyan firaz keno, nê tena navenda Mûşî, Milazgir, Kop û heme qeza û dewê ci, no xoverdayîşê Gimgimî xo ra esas bigêrî û 1’ê Teşrîne de qat bi qat zafêr hesab mêtingerî, Erdogan û AKPe ra bipersî.
Hêzê Erziromijan
Bayik îzeh kerd ke şarê Erziromî weçînayîşê 7’ê Hezîrane de raştîya hêrişan ame, faşîst û mêtingeran waştî weçînayîşê 7’ê Hezîrane de şarê kurd û hêzê demokrasîye bi hêrişan bitersnî labelê şarê kurd û hêzê demokrasîye yê Erziromî hem serê xo çewt nêkerd, hem zî xoverdayîşeko gird reyde verpers da û Erzirom de HDP serkewtişeko gird bi dest vist û o vîneno ke do HDP Erzirom de serkewtişeko gird qezenc bikera û no ser zî rayeko bîn zîhnîyeto faşîst giranê xo dano ser Erziromî.
Bayik bal ant ser dek û dolabê dewleta tirk a mêtinger, AKP û Erdoganî û vat ke hewna no zîhnîyeto faşîst dek û dolaban reyde wazeno verê şarê Erziromî bigêro, êdî şarê Erziromî zano ke zîhnîyeto faşîst qey hêrişê şehîdgeh, erj û dîroka kurdan keno, erziromijî qet Şêx Seîd, Seyîd Riza û şorişgerê roja ewro ti rayî vîr nêkerd û o omidar o ke weçînayîşê 1’ê Teşrîne de HDP Erzirom de weçînayîşê 7’ê Hezîrane hîna serkewtişeko xurt qezenc bikera û no ser zî ganî erziromijî îradeya xo bi xurtî nîşan bidî û o omidar o ke do HDP Erzirom de hûmarê wekîlê xo zî zafêr bikera.
Îradeya şarê Xarpetî
Bayik îzeh kerd ke o wazeno ser şarê xoverdayîşê Xarpêtî qise bikero, çiqas ke bi asîmîlasyon, koçkerdiş, teberê Xarpêtî merdimardişî û bi qirkerdişan wazîyeno Xarpêt mîyanê Kurdistanî ra bêro vetiş zî, ser nêkewt û kurdîtî û Kurdistanî hema zî Xarpêt û dorûverê ci de yeno cuyayiş, gam bi gam şarê Xarpêtî, kurdîtîya xo û Kurdistanê xo ra wayîr vejîyeno û na babete de zî xarpêtijan weçînayîşê 7’ê Hezîrane de gameko gird eşt.
Bayik bal ant ser muhîmîya weçînayîşê 1’ê Teşrîne û dîyar kerd ke Xarpêt navenda ke Şêx Seîd xo ver dayo yo, senî ke Şêx Seîd Çewlîg de, senî ke Seyîd Riza xoverdayîşeko gird dayî, ganî şarê Xarpêtî zî no xoverdayîşî weçînayîşê 1’ê Teşrîne de nîşan bido û wekîlek bivejo, çimkî Xarpet de potansîyeleko gird esto.”
ANF/BEHDÎNAN
Çewlîgijî qet milê xo çewt nêkerdî
Bayik vat ke dîroka Çewlîgî namdar a û Çewlîg cayê xoverdayîşî yo, no herem de qet verê mêtingerîye ser nêameyo çewtkerdiş. Bayik bal ant ser qehremanê Çewlîgî Mehmet Karasungur, Mehmet Hayrî Durmuş, Yildiz Durmuş, Zekî Yildiz û Zekî Yildizî û dîyar kerd ke hêrikyayîşê dîroke de Çewlîg Şêx Seîd veto meydanî.
Bayik aşkera kerd ke dewleta tirk a mêtinger, seba ke nê nirxan şarê kurd ra bido vîrkerdiş, polîtîkayê taybet verba çewlîgijan meşnaya, hîsê olî yê şarê Çewlîgî îstîsmar kerda, seba ke şarê Çewlîgî wayîrê hîsê xurt a olî, welatperwerî û kurdewarîya şarê Çewlîgî zî zaf bi xurt o, çewligijan wayîrê ziwanê xo vejîyenî, çi heyf ke dewleta tirk hem ziwan û kultirê înan, hem zî ol û kurdîtîya înan dijî çewlîgijan şuxilnena û dewleta tirk hewl dana ke çewlîgijan dîrok, kultir û nirxê înan dûr bifîna û o omidar o ke çewlîgijan no raştî fam kerdî, xora weçînayîşê 7’ê Hezîrane nîşan da ke şarê Çewlîgî nê polîtîkayan ra fam kerdo.
Bayik ciresna ke weçînayîş de Çewlîgî ra AKPe 2 wekîlî bi hîleyê HDPe ra dizdna, o omidar o ke no weçînayîş de şarê Çewlîgî rayê xo nêdî AKPe û çewlîgijî rayê xo seba demokrasî, komara demokratîk, neteweya demokratîk, azadîya şarê kurd û azadîya Rayverî bişuxilno û wayîrê sindoqan bivejo û çewlîgijî destûr nêdî hîleyê AKPe û dewlete.