Serokê Xoser yê şaredarîya qezaya Dersîm Mêzgir Tekîn Turkel ke 2009 de ame weçintene û reya dîyeno serokê şaredarî yo behsê gurenayisanê şaredarîya xo kerd. Turkelî hurendîya şaredarîyanê DBP de tayînkerdisê qeyûman rê nêrazîbîyayen damûsna û veng da pêro qûwetanê şoreşgeran ke dûştê hêrişanê faşîzmî de qese, nûmayis û vinetisê xo bikerê jû. 

Tekîn Turkelî vist vîrî ke waxto ke eyî 2009 de şaredarî (beledîya) dewr guret, zaf tewa ci nêmend bî û aşkere kerd ke înan ra avê şaredarî destê AKP de bî û AKPyizan pêro çiyê şaredarî rot bî. 


Şaredarî îradeyê qomîya

Turkelî da zonayen ke şaredarê AKP qeyta gurenayis nîramite û nîya behsê gureyînanê xo kerd: “Jê her şaredarî ma kî gurenayisê awe, pakkerdene, virastena rayanê zerrê qaza virazeme. Lewe nayê de ma serva ke dewizî yenê qaza û teber de manene jû cayê meymanan virast. Cenî û camerdan rê ciya ciya cayî virasteme ke, kes teber de nêmano. Onca jû ca virasteme û dayîmi ceniyan, ebê xo gurenene, qezencê ci ke mavênê xo de bare kenê.”

Turkelî behsê mekanîzmaya gurenayisî yê şaredarî kerd û da zonayen ke ê pêro gurenayisê xo bi qomê qazaya piya danê ramitene. Tekîn Turkelî vist vîrî ke serokê şaredarî yenê sonê, hama na şaredarî yê qomîya. Îradeyê qomîya. Turkelî hayr ant rolê meclîsî de pirr rengî û pirr vengî ser û va: “Gurenayisê ma de roza sifte ra hata ewro tewr jêde kî gencî ca gênê, poşt vejîyenê.  Onca AKP ra qeyir her sîyaset ra jû azayê meclîse estî. Mavênê xo de yemê têhet. Lazim o ke jû qerar bicerime her kes mavênê xo de nayê ceno dest û hîn ano şaredarî. Ya kî veng danime şarî û vame; ‘ma çiyê de niyanên sero qerar cemê, bêrê sima kî qesê xo ma de bare bikerê.’” 


Hometa bêîrade bena kole 

Serokê şaredarîya Mêzgir Tekîn Turkelî 24 şaredarîyanê DBP rê tayînkerdişê qeyûman rê kî nêrazîbîyen damûsna û nayî zey bêîradekerdenê qomî hesibna. Turkelî vist vîrî ke serokê şaredarî bojî, çim, lingê şarîyê û nîya dewam kerd: “Qeyum eştiş bojî, çim, dest payanê înan ci ra kena. Qeyûm eştiş jû qom bêîrade kerdena. Eke jû homete bî bêîrade, bîyayena ci kî bena vîndî. Eke bîyayena jû homete nêbo, a dem a homet bena jê wasî. Bena kole Gorê ayê nî şaredarî îradeyê qomîyê.”

Turkelî aşkere kerd ke wexto ke jû şaredarî rê qeyûm amo estene, gunê pêro şaredarîyê bînî verra nayê bivejyê û va ‘eke nîya nêkerd teyna dur ra serkerdî meste bore î ke rastê na zorvajîye yenê. Niya xelesnayiş nêbeno.’


Wazenê pêro quwetan teyna caverdê

Tekîn Turkelî da zonayen ke gunê her kes waxto qeseykerdene, waxto eskerakerdisan verdo û verra nayê bivejyo, vengê xo berz bikerê. Turkelî vist vîrî ke nika di hetî estê; zilmkerdox û zilmdîyayox. Jû zilm keno, jû kî zilm vîneno û nîya dewam kerd: “Wa kes mevajero mi rê tewa nêkene. Dewleta polîtîka cephê demokrasî zar kerdene dana ramitene. Wazena jû bi jû pêro nî qûwetan teyna caverdo, qûwete ra waredo.”  Turkelî hayr ant heremanê ke xorayverînî amey îlan kerden û raştê hêrîşê giranî amey ramitene ser û veng da herkesî ke ebê xo şerê ucayan, bi çimanê xo bivîne ke qûl rê sekerdî. Turkelî da zonayene ke o bi xo şîyo Şirnex, Nisêbîn, Cizîr û nî cayî dîyo û nîya va: “O dezo ke iyê oncene ma kî onceme. Jû dewlete eke ê însonan waxto ke hora nêvînena honde hêrîş kena. Honde rizne, dormê telana gurete, hazar nê sehazaran cayê xo ra kerdî. No sûcê mordemîyo. Wastena qomî teyna ebe zonê xo de qeseykerdene, kamîya xo ciwîyayena bî. No qirkerdene ra qeyir tewa nîyo.” Turkelî veng da pêrokîn şarê kurd ke cayanê xorayverînan rê wayir bivejyo, nî rozan de jûbin rê poşt bidê. 


Quwetê xo bikerime jû 

Tekîn Turkelî cewab da persa ma ya derheqê kar ra dûr eştişê malîm û akademîsyenan kî û behsê sebebanê hedef guretisê ci kerd. Turkelî da zonayen ke malîm û akademîsyenî kese ke wende, kese ke zerrê homete de bi zonayox yenê naskerdenê yê û nîya va: “Gunê nî çormeyê çîyo ke rast nîyo verra ci bivejyê, gunê verra zilm qesê xo bibo. Nika na hukumat sekena? Wazene înan pêrone bicero binê qontrolê xo. Xo rê kole bikero. Jê pêro homete înan kî hedef gurete.”

Turkelî waşt ke endî pêro dormeyî vengê xo verra na faşîzme vejerê û aşkere kerd ke no nîya nêsono. Tekîn Turkelî vist vîrî ke serva xelesnayişî bar gineno pêro dormeyan, pêro qûwetanê şoreşgeran ser û bi nê na vengdayisî qiseyanê xo qedîna: “Gunê cephê demokrasî qûwetin bikerime. Pêro pîya bêrime têhet qese xo, çalekîyanê xo, vinetisê xo jû bikerime.


MERAL KUÇUK / BRUKSEL