Şahîya ziwanî bin banê Şaredarîya Gird a Amedî de bi rayîraberdişê Komîsyona Ziwan û Daîreya Çimeynîyê Merdiman raya sifteyin bi xebatkarêy xo Roşana Ziwanê Kurdî pîroz kerd. Şahîya pîrozkerdişê Roşanê Ziwanê Kurdî hewşa şaredarîyî de ame viraştiş. Şahîyî de; elbane, dengbejî, helbestwendiş, werdiş û verberda zanistî ame viraştiş.
Hewşa şaredarî de verbê qedîyayişê mesaîyî de zafêreya xebatkarêy şaredarî bonî ra amey war û beşdarê şahîyan bîy. Şahî sifte bi koma elbanî dest pê kerd. Koma elbanî bi armonîya xo zenga goşê xebatkaran qedîna û demêy zaf weş bi înan da cuyayişî.
Bi Kurdî kar bikerêy
Pey koma elbaneyî de hevşaredar Firat Anli semedê qise bikero ra vejya xebatkaran ver. Anli qala rewşa ziwanê kurdî ya ewro kerd û heme xebatkaran ra waşt ke ney ra pey wa xebatkarîy heta înan ra yeno wa bi kurdî karê xo bikerêy. Anli herî peynî Roşanê Ziwanê Kurdî ya xebatkaran û hemeyê kurdan pîroz kerd.
Pey de hevşaredar Gultan Kişanak vejya mîkrofonî ver la bi tirkî qise kerd. Lêborîna xo goşdarvanan ra waşt û soz da ke do kurdî bimûsa.
Werd cenîyan keyî ra ard
Xebatkarêy şaredarî yê cenî keyêy xo de werdêy tewr bi tewr viraştbîy û ardbîy şahîyî. Tewr bi tewr werdêy şenik ke payan ser de ameyê werdiş bîy.
Werdiş dets pêkerdbi. Eynî demî de helbestêy ke bi vengê mamosteyê kurdîy wendîy olan dayê. Wexta helbestîy amey wendiş zafêreya xebatkaran goşê xo dabîy vengî fekê xo dabîy werdişî.
Des persîy persay
Herî peynî de zî verberda zanistîy (bîlgî yarişmasi) bi peşkeşkerdişê Medenî Alpkaya û Ehmedê Birayî pêk ame. Semedo ke raya sifteyin bi bin banê şaredarî de verberda zanayişî pêk ameyê zaf bala xebatkaran ont.
Verberd 3 komêy ke nameyê înan Koma Kuwe, Koma Sûr û Koma Zêrd bîy û her komî de 3 kesan pêk ameynê ca girotbîy. 10 persîy amey persayiş. Bi coş û heyecaneke zaf verberd dewam kerd. Encamî komêy Kuwe û Zêrd bi hawtay puanan, zerd zî bi 50 puanan qedîna. Xelatêy ke tûrê şaredarîyî de ameybîy amedekerdiş day heme kesêy koman de ca girotbîy.
EHMEDÊ BIRA/AMED