Aşma îlone ra heta ewro hemşaredaranê DBP ra (22ê ci cinî) 45 cê ci amey tepiştiş û 35ê ci zî bi qeyûman amey xespkerdiş. Walitîyê Amedî 28ê Mijdara 2016î de qerar da û dest rona selahîyetê 12 hemşaredaranê qezayarê Amedî ser. Hemşaredaranê Licê, Peyas û Çinar ke no qerarî rê nêrazîbîyayiş damûsnay day zanayiş ke şar do cewabê nayî bido.
Hemşaredarê Peyasî Mehmet Alî Aydin ke qerarê walitî zey qerarekê sîyasî hesibna da zonayen ke şaredarîye ke bi qeyûman amey xespkerdiş açarnîyay qereqolî. Aydinî dîyar kerd ke nê şaredarî endî xîztemê şarî nêkenê.
‘Ma dê serbikewê’
Aydinî vist vîrî ke 300 hezar weçîntoxê şaredarîya Peyasî estê û va, ‘qeraro ke ame dayen bi raya îxaleyî gurekar bi destûra qeymeqamê qeza yenê girotiş. Aydinî aşkere kerd ke şaredarîyê ke amey xespkerdiş hinî nêşkenê xîzmeta xo biramnê û wina dewam kerd: “Nêrazîbîyayişê ma yê hiquqî dê destpa bikerê. Ma dê Baroya Amedî ra zî yardim biwazê.Kes no qerarî û nezdîbîyayişê şaredarîyan bi no şiklî qebûl nêkeno. Şar do cewab bido nê qeraran û ma dê serbikewê.
Şaredarî şîrket nîyo
Hemşaredarê Çinarî Ahmet Cengîzî zî vist vîrî ke selahîyetê şaredarîyanê Çermûg û Çinguşî yê ke AKP’yijê nêamey xespkerdiş û va, ‘no qerar çinkerdişê şaredarîyanê DBP hedef keno.’ Cengîzî ard ziwan ke bi OHALî ra îradeyê şarî yeno binligkerdiş. û wina dewam kerd: “Dûştê no qerarî de ma dê şarê xo ra pîya xover bidê. Şaredarî şîrketê cemaatan nîye ke qeyûmî xesp bikerê. Şaredarî dezgehê ke bi îradeyê şarî ameyê girotiş ê.
‘Ma dê şarê xo het de bê’
Hemşaredara Licê Rezan Zûgûrlû zî da zanayiş ke ê qerarê walitî nêsilasnenê û aşkere kerd ke rexmê qerarê walitî zî iyê dê xizmetanê xo biramnê. Zûgûrlû ard ziwan ke hemşaredar gurekarê dewlet nîye û wina dewam kerd: “Bi qerarî ra pîya zorvajîye ser şaredarîyan zî dest pa kerdî. Qerarê meclîsa şaredarî zî nînê qebûl kerdiş. Çi beno wa bibo, ma ser karê xo yê. Ma no qerarî û polîtîkayî qebûl nêkenê. Şarî ma weçînayo û ma zî bi şarê xo ra yê. Ma dê raya xo ra şirê û hemverê qerarî zî tewrê xo damûsnê.
DÎHABER / AMED