Ver bi weçînayîşê 24ê Hezîrane de 2 îttîfaqî ameyî awankerdiş û hewl dîyeno HDP teberê weçînayîşî de biverdî. Babete ser o sîyasetmedarî qisey kerdî û reaksîyon nîşanê na rewşe dayî. Sîyasetmedar û Nuştox Tarik Zîya Ekîncîyî dîyar kerd ke yê ke xo ra vano ‘ez demokrat a’ ganî hetê HDPyî de ca bigîrî. Bi nizdîbîyayîşê weçînayîşê 24ê Hezîrane, namzedê Serekkomarîye yê heme partîyan dîyar bi. Tewr peynî CHPyî Muharrem Înce û HDPyî zî Selahattîn Demîrtaşî sey namzedî nîşan dayî. HDPyî bi îzehetêko nuştekî ke xeylê partîyê sîyasî, rêxistinê komelkî yê sîvîlî û welatîyî beşdar bîyî de namzedê xo aşkere kerd. Namzedîya Demîrtaşî hetê xeylê kesan ra bi hawayo kêfweşî ameye dîyayîş. Babete ser o sîyasetmedarî qisey kerdî. Endamê Dîvanê Serekîye yê KCDyî Ruken Kilinçe va ‘CHPyî ser dişmenîya kurdan ra îttîfaqêk awan kerd’ û wina domnaye: “Herçiqas ke nê îttîfaqî HDPyî teber de verdayî zî, ma vînenî ke do no weçînayîş de do HDP qezenç bikero.” Serekê ESPyî yê bajarê Amedî Ramazan Karakayayî zî wina va: “Îttîfaqê ke ameyî awankerdiş ra yeno dîyayîş ke her di zî hetê raştî de yî. Her di zî seba ke HDPyî reyde îttîfaq awan nêkerî, ameyî awankerdiş. Ma do sosyalîst, şorişgêr û welatperweran reyde pîya hereket bikerî.” Ganî îttîfaqê kurdan bibo Hemserekê Egîtîm Senî yê Amedî yê Şûbeya 2î Recep Şîmşekî zî da zanayîş ke demokratîkbîyayîşê Tirkîya ancax bi yewîya kurdan mumkin o û wina va: “Seba ke Tirkîya demokratîke bibo, ganî kurdan reyde îttîfaq bikerî. Eke ma qala meclîsêko demokratîke bikerî, no ancax bi têhetameyîşê cîyayîyan beno. Goreyê mi vera îttîfaqanê bînan de ganî kurdî zî îttîfaqê xo awan bikerî.” Ma suryanîyî do destek bidî HDPyî Yewîya Suryanîyê Ewropaye ra Endamê Meclîsê Pêroyî yê HDKyî Tuma Çelîkî va ‘ma prosesêko muhîm ra derbaz benî’ û wina domna: “HDP pîyatîya şaran, demokrasî û azadîye pawena. Ma do weçînayîş de mabênê 2 cuyan de yewî tercîh bikerî. Ma suryanîyî do hetê HDPyî de ca bigîrî û namzedê ma Selahattîn Demîrtaş o. Ma do seba Demîrtaşî xebatanê xo bikerî. Ma zanî ke CHP zî partîyanê bînan ra cîyayêr nîya. Ti problemê ma yê baraj û weçînîyayîşî çin o.” Yê demokratî ganî hetê HDPyî de bibî Sîyasetmedar û Nuştox Tarik Zîya Ekîncîyî zî no het de qisey kerd û vînayîşê xo pare kerdî. Ekîncîyî va ‘seba ke HDP binê bendê weçînayîşî de biverdî, barajê se ra 10î nêwedarnayî’ û wina domna: “Xora îttîfaqanê xo de HDPyî nêgirewtî mîyanê xo. Eke hetan ra yewî bigirewtêne, o wext do raşteyan de ci sucdar bikerdêne û bivatêne ‘biewnênê nê bi terorîstan reyde bîyî yew’. Eke HDP tena bêro verdayîş, hêzê demorkasîye do vînî bikerî. Cok ra ganî yê ke xo ra vano ‘ez demokrat a’ hetê HDPyî de ca bigîro. Wa partîyê kurdî hetê HDPyo ke Tevgerê Azadîya Kurdî temsîl keno de ca bigîrî.” MERKEZÊ XEBERAN