Wekîlê Serekîye yê HDPyî Ayhan Bîlgenî derheqê weçînayîşê herêmî û nizdîbîyayîşî îqtîdarî ser o qisey kerd. Bîlgenî qiseykerdişê xo de bale ant tehdîdanê AKPyî ser û wina va: “AKPyî rewna xebatanê weçînayîşî dayo dest pêkerdene û hewl dano bi hêrişan netîce bigîro. Labelê ê çiqas hêriş bikerî zî şarî do netîce dîyar bikerî.” DENÎZ ÎKE ANF / AMED Nê rojan de îqtîdarê AKPyî xebatanê weçînayîşê herêmî dayo dest pêkerdene. Labelê AKP bi vatiş û kerdişanê xo wina nîşan dano ke vera HDPyî de xebatê weçînayîşî dayî dest pêkerdene. Serekê Pêroyî yê AKPyî Erdoganî çend rojî verê dîyar kerdbî ke eke namzedê HDPyî qezenç bikerî, ê do herinda înan de qayûm tayîn bikerî. Dima ra bi operasyonanê sîyasîyan xeylê sîyasetmedar û rojnamegerî ameybî tepiştene û nînan ra bi desanê ci ameyî tewqîf kerdene. Heyetê Weçînayîşî yê Berzî ame hişyar kerdene û her roje muxtarî karî ra yenî girewtene. Babete ser o Wekîlê Serekîye yê HDPyî Ayhan Bîlgenî qisey kerd û hişyarîyê muhîmî kerdî. Bîlgenî dîyar kerd ke ‘îqtîdar bi hawayo baş zano ke eke bi hawayo normal weçînayîş bivirazîyo, o do vînî bikero’ û wina va: “Hem krîzê ekonomîke û hem zî polîtîkayê şaşî destûr nêdanî ke ê îdare de bimanî. Cok ra polîtîkayanê winasîyan domnenî û HDPyî îlegalîze kenî.” Eke teslîm bibî, alternatîfî awan nêbenî Bîlgenî qiseykerdişê xo de qala weçînayîşê herêmî kerd û wina va: “Herçiqas ke îqtîdar hende zext û tedayan keno zî netîceyê weçînayîşan do hetê şaran ra bêrî dîyar kerdene. Vera nê polîtîkayê ke şarî ser o yenî ferz kerdene de berpirsîyarîyêka girde kewena milê muxalefetî ser. Tena plan û kayê îqtîdarî netîceyê weçînayîşî dîyar nêkenî. Çîyê ke netîceyê weçînayîşan ser o tesîr bikerî, hêz û stratejîyê muxalefetî yî. Eke muxalefet sere rono û teslîm bibo, o wext îmkanê ronayîşê alternatîfî nêmaneno. Labelê eke çepê na rewşe bibo yanî eke muxalefet stratejîyanê neweyan aver bîşêro û hêvîyanê neweyan awan bikero, o wext do weçînayîşan ra dima beno ke tayê çîyî bibî.” Weçînayîşan de qerardarî lazim a Bîlgenî qiseykerdişê xo de qala nizdîbîyayîşê HDPyî yê AKPyî kerd û wina va: “AKPyî xebatanê weçînayîşê herêmî rewna dayo dest pêkerdene. AKP heme xebatanê xo bi polîtîkayanê sîyakerdişê HDPyî dano domnayene. Erdogan bi tehdîdanê xo hewl dano HDP û xebatkaranê ci goreyê xo dîzayn bikero. Ganî vera nêyî de kurdî pîya hereket bikerî û qerardarîya ê bi xo eşkenî xo îdare bikerî nîşan bidî.”