Rayberê Şarê Kurd Abdullah Ocalan 15ê Sibata 1999î ra nata Girawa Îmrali de binê tecrîdî de yo û bi taybetî çend serrê peyênan de no tecrîd zaf giran bîyo. Nizdîyê 2 serrî yo ke Ocalanî ra ti xebere nîna girewtiş û verê cû ser medyaya komelkî de derheqê weşî û ewleyîya Ocalanî de tayê xeberî ameybî parekerdiş.
Kurdî û dostê kurdan zî bitaybetî weşanîyayîşê nê xeberan ra dima Kurdistan, Tirkîya, Rojhelato Mîyanên û Ewropa de zaf cayan de weriştî payan ser û seba weşî, ewleyî û azadîya Rayberê Şarê Kurd Abdullah Ocalanî de çalakîyan virazenî.
Babete ser o Endamê Dîvanê Hemserekîya Kongreya Komelê Demokratîke (KCD) Selîm Sadako ke Riha de tayê pêvînayîşî kerdênê, qisey kerd. Sadakî qiseykerdişê xo de dîyar kerd ke OHAL ra tewr zaf bajarê Rihaye tesîr bî û rayîrê na rewşa kaosî ra xelisîyayîşî resayîşê fikrê Rayberê Şarê Kurd Abdullah Ocalanî yê şarî yo.”
Tena çare wedarîyayîşê tecrîdî yo
Sadakî ard ziwan ke seba şîyayîşê ver bi çareserîya demokratîke tena çare Ocalan o û va: “No proses de ancax tena ser rayîrêkî ra ma eşkenî vera çareserîya demokratîke şêrî; o zî seba ke Birêz Ocalan rolê xo kay bikero, destûr bêro dayîş. Seba nêyî ganî şert û mercî bêrî awankerdiş û astengîyê ke estî zî bêrî wedarnayîş. Ma heme şahidîye kerd ke Birêz Ocalan senî rolê xo kay kerd. Cok ra lazim o tecrîd bêro wedarnayîş. Bi no hawa Tirkîya bena demokratîke.”
Ê mecbur î ke kurdî qebul bikerî
Sadakî bale ante amadekarîya Tirkîya ya seba hêrişê Efrînî ser û wina va: “Tirkîya mîyanê hewldayîşê hêrişanê cîdîyan de ya. Gelo şarê Efrînî erdê Tirkîya dagîr kerdo? Ya muhîm aye ya ke Tirkîya kurdan reyde têkilîyanê dostanî aver bîşêro. Se ra 70ê dormeyê sînoranê Tirkîya de kurdî estî. Îskenderun ra heta Îdirî. Eke ewro hêrişê Efrînî bikero, siba do nêşênbo Kobanê, Dihok, Zaxo, Urmîye û sewbîna ra vajo ‘şima cîranê min î’. Tena çareyêka Tirkîya esta, aye zî estena kurdan ra hîskerdişê îftîxarî yo. Kurdê Efrînî do qeraranê xo bi xo bigîrî. Tirkîya nêşêna qerarê nêyî bigîra. Tena Efrîn de nê, ganî Tirkîya kurdanê mîyanê xo zî qebul bikero.”
Do Tirkîya tena bimana
Sadakî peynîya qiseykerdişê xo de va ‘bi kişîyayîş û kiştişî reyde nêresenî cayêk’ û wina qedêna: “Ti cayê dinya de no sîstem dewam nêkerdo, cok ra Tirkîya de zî mumkin nîyo ke dewam bikero. Do bi kamcîn amancî hêrişê Efrînî bikero? Çi karê leşkerê tirkî Efrîn de esto. Ganî muxalefetê Tirkîya bi hawayo cîddî nizdîyê babete bibo. Leşkero ke bimiro, berpirsîyar do Serekkomar û Serekwezîr nêbî? Ê do senî hesab bidî keyeyanê înan. Cok ra ganî fek nê zîhnîyetî ra verabidî. Nêke do Tirkîya vînî bikera û do tena bimana.”
MA/RIHA
