FÎLÎZ ZEYREK/ŞÛJIN/EDENE
Tevgerê Cinîyanê Azadan (TJA) û Meclîsê Cinîyan yê HDPyî 19ê Tebaxe de bi sloganê ‘Do tecrîd vinî bikero û azadî qezenç bikera’ Stenbol de kampanyayêkê daybî destpêkerdiş. Cinîyî dîyar kenê ke tecrîdo ke Rayberê Şarê Kurdî Abdullah Ocalanî ser de yeno meşnayîş, raştîya xo de şarê kurdî ser de yeno meşnayîş. Cok ra ganî xebatî zêde bibîy. Heta nika 600 ra zêdeyêr reyan keye û avûkatan seba ke pêvînayîş bikerî muracat kerdîy, labelê muracatê înan ame redkerdiş.
Babete ser o Parlamentera HDPyî ya Edene Meral Daniş Beştaşe qisey kerde û tecrîd û kampanyaya ke dîyaya destpêkerdiş ser o malumatî dayî.
‘Tarîxê dinya de tecrîdêko winasî çin o’
Beştaşe dîyar kerde ke yê ke nê tecrîdî meşnenî do rojêk bêrê mehkemekerdiş û wina va: “Nîsana 2015î ra heta nika ti xebere Rayberê Şarê Kurdî Abdullah Ocalanî ra nîna girewtiş. Derheqê weşîya ey de ti xebere çin a. Ocalan rayber û îradeyê mîlyonan o; cok ra nêeşkenê binê tecrîdî de biverdî. Ma sey HDPyî tecrîdî qebul nêkenê. Eke Tirkîya vana ez welatêko demokrat a, gerek tecrîd wedarna.”
‘Cinîyî do tecrît bişiknî’
Beştaşe daye zanayîş ke cinîyan kampanyaya ke dayî destpêkerdiş reyde, hedef kenê ke tecrîdî bişiknê û wina domnaye: “Cinîyî do tecrîdî bişiknê. Ma do Abdullah Ocalan o ke îradeyê ma yo, ci azad bikerî. Ma êdî nêwazenê no welat de mergî bêrê cuyayîş. Semedo ke ma wazenê aştîye awan bikerê. Ma bi vengdayîş, sebr, xoverdayîş û muxatabîya Birêz Abdullah Ocalanî ra bawer kenê ke do aştî bîyaro.”
Ganî ma azad bikerî
Beştaşe dewamê qiseykerdişê xo de va ‘wextê çareserîye de parlamenteranê AKPyî û wezîrê ci pesnê Abdullah Ocalanî dayênê’ û peynîya qiseykerdişê xo de wina va: “Ma veng danê heme cinîyan, dayîkanê kurd û tirkan. Vindarnayîşê nê şerî destê ma cinîyan de yo. Eke ma nêwazenî wa gonîya domananê ma birijyo û ma aştî û azadî wazenî, o wext ganî ma mîmarê aştî û azadîye azad bikerê.”