CEFER CEFO / ANHA / ŞEHBA
Dewleta Tirkî û çeteyê ke girêdayeyê ci yî, demêk o ke Efrîn dagîr kerdo. Dewleta tirk û çeteyê ci hem hêrişê teberê merdimîye ser efrînijan de kenî û hem zî mekanê tarîxî yê Efrînî hedef gênî. Hemserekê Midûrîya Eseranê Tarîxîyan yê Efrînî Hemîd Nasirî no derheq de qisey kerd û melumatê muhîmî dayî.
Nasirî dîyar kerd ke hêriş û dagîrkerîye ra ver heme eser û cayê tarîxî yê Efrînî amebî qeydkerdene û wina va: “Ma dagîrkerîya dewleta tirkî ra dima rewşa peyêne ya cayanê tarîxîyan bir esman qeyd kerd. Heto bîn de eserê tarîxî ke ameyî remnayene bi Tirkîya zî ameyî tesbîtkerdene.”
Nasirî da zanayene ke înan Şehba de bi sergîyêke nîşan dayo ke rewşa verêne û peyêne ya eseranê tarîxîyan çî yo û wina va: “Bi aye sergî texrîbat ame nîşandayene. Bajar de texrîbat û qaçaxwanîya eseranê tarîxîyan xeylê zahf o. Seba ke dewleta tirkî destûr nêdana ke dezgehê xoserîyî derbasê herême bibî, hîrayîya texrîbatî nîna zanayene. Ma amanc kenî ke bi na sergîye texrîbatan nîşanê heme dinya bidî. Ganî seba ke texrîbatanê Efrînî tesbît bikero, komîteyêk bêro awankerdene.”